Циркийн жүжигчин, экстрем артист М.Мягмарсайхан наймдугаар сарын 8-нд Архангай аймгийн Чулуутын хавцал дээгүүр 50 метрийн өндөр 130 метр олсон дээр ямар ч хамгаалалтгүй алхаж, “Тэнгэрийн алхаа”-гаа хийлээ. “Sky walk” хэмээх энэ экстрем үзүүлбэр нь европ, АНУ, БНСУ, БНХАУ-д эрчимтэй хөгжиж байгаа бөгөөд өндөр утсан дээрх үзүүлбэрийг хийж байгаа цорын ганц монгол хүн юм.

Тэрбээр 1999 оноос циркийн чанга утасны үзүүлбэрт бэлтгэж байгаад, 2002 онд манежинд өндөр утасны high wire үзүүлбэр тоглож, улмаар 2005 оноос барилга байшин, уул хад, цэнгэлдэх хүрээлэнгийн дээгүүр татсан утсан дээгүүр хамтрагч Фрэдди Ноктой явдаг болжээ.

Өнгөрсөн жил эх орондоо анх удаа “Тэнгэрийн алхаа”-г Өвөрхангай аймгийн Улаанцутгалан хүрхрээн дээгүүр 28 метрийн өндөр 57 метр тросс байршуулж алхсан бол энэ удаа амжилтаа ахиулж, Чулуутын хавцал дээр sky walk хийжээ. Түүний үзүүлбэрийг энэ жил 4000 гаруй хүн үзэж сонирхсон байна.

Аялал жуулчлалын шинэ брэнд бүтээгдэхүүн бий болгох, хүний амины үнэ цэнийг ойлгуулах, Монголын үзэсгэлэнт байгалиа гадаад, дотоодын үзэгчдэд уран бүтээлээрээ дамжуулан сурталчлах гээд олон давхар зорилго агуулсан энэ үзүүлбэрийг бий болгоход 50 гаруй хүний бүрэлдэхүүнтэй циркчдийн баг ажиллажээ.

Тэрбээр ирэх жил Архангай аймгийн Хоргын тогоо, Булган аймгийн Уран тогооны аль нэгэн дээр скайвок хийхээр судалгаагаа эхлүүлсэн байна. Түүнчлэн Улаанбаатар хотод өндөр барилга дээгүүр мэргэжлийн багийнхантайгаа хамтран энэ үзүүлбэрээ хийх хүсэл ч бий аж.

А.СҮРЭН