Д.Дамба-Очирт холбогдох хэргийн шүүх хурал хойшиллоо

НЭМЭЛТ: 11:10 ЦАГ

Өнөөдөр 10.00 цагт зарлагдсан гэм буруугийн шүүх хуралдаанд шүүгдэгч Д.Дамба-Очир нэмж өмгөөлөгч авах, уг өмгөөлөгч нь хавтаст хэргийн материалтай танилцах хүсэлт гаргасныг шүүх хүлээн авч, шүүгдэгчийг өмгөөлүүлэх эрхээр хангаж, шүүх хуралдааныг наймдугаар сарын 19-ний өдрийн 09.00 цаг хүртэл хойшлуулав.

Шүүх хэргийг хүлээн авсан өдрөөс хойш шүүгдэгч болон түүний өмгөөлөгчийн гаргасан хүсэлтээр шүүх хуралдаан хоёр дахь удаагаа хойшилж байна хэмээн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн Тамгын газраас мэдээллээ.

УИХ-ЫН ГИШҮҮН АСАН Д.ДАМБА-ОЧИРТ ХОЛБОГДОХ ХЭРГИЙН ШҮҮХ ХУРАЛ ЭХЭЛЛЭЭ

НЭМЭЛТ: 11:00 ЦАГ

УИХ-ын гишүүн асан Д.Дамба-Очирт холбогдох хэргийн шүүх хурал эхэллээ. Тэрбээр шүүх хуралдаанд биечлэн оролцож байна.

Д.ДАМБА-ОЧИРЫГ ӨНӨӨДӨР ШҮҮНЭ

УИХ-ын гишүүн асан Д.Дамба-Очир нь ЖДҮХС-аас “Сапфир стоун” ХХК-д 1.2 тэрбум төгрөгийн зээл авахад нь дам байдлаар нөлөөлсөн байж болзошгүй хэргээр хоёр жил шалгагдсан. Түүнд холбогдох гэм буруугийн шүүх хурал өнөөдөр /2020.08.12/ Баянзүрх дүүргийн Эрүүгийн хэргийн анхан шатны шүүхэд 10.00 цагт болно.

Д.Дамба-Очир холбогдох хэргийн шүүх хурал өнгөрсөн долдугаар сарын 30-ны өдөр болсон ч шүүгдэгч Д.Дамба-Очир, түүний өмгөөлөгч нар ирээгүй шалтгаанаар шүүх хуралдааныг наймдугаар сарын 12-ны өдрийн 10.00 цаг хүртэл хойшлуулсан юм.

Шүүхээс Д.Дамба-Очирыг хувийн баталгаа гаргах таслан сэргийлэх арга хэмжээг зөрчсөн, эрүүгийн хэрэг хянан шийдвэрлэх ажиллагааны явцад санаатай саад учруулсан үндэслэлээр албадан ирүүлж, цагдан хорих таслан сэргийлэх арга хэмжээ авахаар шийдвэрлэсэн билээ.

Э.БУРАМ