БНСУ-ын Байгалийн гамшигтай тэмцэх штабаас Мягмар гаригт мэдээлснээр, хүчтэй аадар бороо үргэлжлэн орж, хөрсний гулгалт үүсч, үер буун, дөрвөн өдрийн дотор 12 хүн амиа алдаж, 14 хүн ор сураггүй болж, 7 хүн бэртжээ. Амиа алдсан хүмүүсийн дунд Сөүл хотын оршин суугч 1, Кёнгидо мужийн 7, Чунчон-Пукто мужийн 4 оршин суугч байсан аж.

Хүчтэй аадар бороо орсны улмаас тус улсад 600 гаруй байшин сүйдэж, хөдөө аж ахуйн 5000 гаруй га газар усанд автжээ. Бүс нутгуудаас 1000 гаруй хүнийг нүүлгэн шилжүүлсэн байна. Түүнчлэн Сөүл хотод хурдны зам болон Ханган голын гүүрний хөдөлгөөнийг хэсэгчлэн хаажээ.

БНСУ-ын Ерөнхий сайд Чон Се Гюн оршин суугчдадаа аль болох гадуур гарахгүй байхыг уриалж, байнгын бэлэн байдалд байх тухай захирамжийг шуурхай албанд өгсөн байна.

Эх сурвалж: ТАSS
Б.ЖАРГАЛ