Хөдөлмөр, нийгмийн хамгааллын яам (ХНХЯ) нийгмийн даатгалын шимтгэл (НДШ)-ийн тайланг цахимжуулах төсөл боловсруулж, Азийн хөгжлийн банк (АХБ)-ны “Хүнс тэжээл, нийгмийн халамжийн нэмэлт санхүүжилт төсөл”-ийн хүрээнд ажлаа өнгөрсөн оны дөрөвдүгээр сараас эхлүүлсэн билээ. Тус ажил одоогийн байдлаар 90 хувьтай хийгдэж буй бөгөөд энэ оны аравдугаар сард бүрэн цахимжиж дуусах юм байна.

Монгол улсад Нийгмийн даатгалын тухай хууль 1995 оноос хэрэгжиж эхэлсэн. Ингэснээр ажил олгогч нь НДШ төлөлтийн НД-7, НД-8 тайланг нийгмийн даатгалын байгууллагад цаасаар хүргүүлэн баталгаажуулж ирсэн. 1995-2005 оны хооронд өссөн дүнгээр 1.1 сая ажил олгогч, 42.4 сая даатгуулагчийн нийгмийн даатгалын шимтгэл төлөлтийн 12.8 сая хуудас тайланг цахимжаагүй, цаасан хэлбэрээр ирүүлснээр 21 аймаг, 9 дүүргийн Нийгмийн даатгалын хэлтэст хадгалагдаж байжээ.

НДШ-ийн тайланг цахимжуулах төслийн хүрээнд 2020-2024 онд даатгуулагч, иргэнд нийгмийн даатгалын шимтгэл төлсөн лавлагааг цахимаар, цаг хугацаа, орон зайнаас үл хамааран түргэн шуурхай гаргаж өгөх зэргээр олон төрлийн цахим үйлчилгээ нэвтрүүлэх боломж бүрдэх талаар ХНХЯ-наас мэдээлэв.

Нийгмийн даатгалын дэвтрийг цахим хэлбэрт шилжүүлэх нөхцөл бүрдсэнээр хуурамч лавлагаа авах, үндэслэлгүй тэтгэвэр тогтоолгох боломжгүй болох юм. Мөн нийгмийн даатгалын сангаас олгох тэтгэвэр, тэтгэмж тогтоолгох өргөдөл, материалыг цахимаар хүлээн авч шийдвэрлэх боломжтой болох нь. Үүнээс гадна нийгмийн даатгалын байгууллагын хяналт шалгалтыг зайнаас, цахимаар хийх, ажил олгогчийн санхүүгийн ажилтан, нийгмийн даатгалын байцаагч ажилтнуудын ажлын ачаалал буурах зэрэг олон давуу талтай ажээ.

Б.ЖАРГАЛ