Ерөнхийлөгчийн сонгуульд өрсөлдөхөө зарлаад зогсохгүй эхний сурталчилгаагаа хийгээд удаагүй байгаа Канье Уэст өөрийн твиттер дээр эхнэрээсээ салах бодолтой байгаагаа нийтлээд, удалгүй устгажээ.

Тэрбээр сонгуулийн эхний сурталчилгааны уулзалт дээрээ илтгэл тавьж байгаад өдгөө долоон настай охин Норт Уэстийг анх аборт хийлгэх гэж байсан талаараа ярьж, нулимс унаган удирдлагаа алдсан билээ. Удалгүй тэрбээр Вайоминг дахь гэртээ ирээд мэргэжлийн хүмүүсээс тусламж авахаас татгалзан, оронд нь твиттер дээрээ хэд хэдэн үг нийтэлж, түүнийгээ устган сэтгэл санаа тогтворгүй байгаагаа харуулсан юм.

Хоёр өдрийн өмнө/2020.07.21/ тэрбээр эхнэрээсээ салахаар хичээж байгаагаа тайлбарлан, хадам эх Крис Женнерийн тухай ярихдаа нэрийг нь Крис Жон Ун хэмээн өөрчилж бичсэн байна.

Мөн тэрбээр Ким, Крис хоёрыг өөрийнх нь зөвшөөрөлгүйгээр сэтгэцийн эрүүл мэндийх нь талаар нийтэд дэлгэсэнд уурлаж, тэр үйлдлийг нь арьс өнгөөр ялгаварлан гадуурхалттай холбон тайлбарласан байна. Цаашлаад “Get Out хэмээх кино яг л миний амьдралтай адилхан байна. Намайг охиныхоо тухай ярьж уйлснаас болоод Ким над дээр эмч дагуулан ирж, тэр кинон дээр гардаг шигээр хорихыг оролдож байна” хэмээн бичжээ.

Тэрбээр долдугаар сарын 19-нд олны өмнө үг хэлж байгаад гэр бүлийнхээ талаар “Би охиноо алах шахсан. Найз охин маань над руу хашгирч, уурлаад, би бодолд дарагдаад сууж байсан үеийг би тод санадаг. Тухайн үед би дуу хийгээд, олон хүүхнүүдтэй наргиж цэнгээд, сахилгагүйтэж явлаа. Гэтэл Ким надад жирэмсэн болсноо хэлсэн. Түүнийг нь би сонсмогцоо баярлах гэснээ гэнэт бодолд дарагдсан юм. Тэр минь уйлж байлаа. Нэг сар, хоёр сар, гурван сар өнгөрсөн. Бид хүүхдээ төрүүлэхгүй гэж ярилцсаар л байлаа. Түүний гарт уухад бэлэн зулбуулах эм байсаар л байлаа” хэмээн ярихдаа сэтгэлээ барьж дийлэлгүй уйлсан юм.

Харин Ким Кардашианы хувьд нөхөр нь ийнхүү хэт хувийн мэдээллээ дур мэдэн олонд тайлагнасанд нь асар их уурлаж байгаа гэнэ.

Эх сурвалж: UNILAD