Нидерландын Утрехтын их сургуулийн мэргэжилтнүүдийн боловсруулсан нэгэн сонирхолтой судалгааны тайлан анагаах ухааны “PloS Medicine” сэтгүүлд нийтлэгджээ.

Уг тайланд дурдсанаар хүн төрөлхтөн гараа тогтмол угаах, амны хаалт заавал зүүх, олон нийтийн газраас явахдаа хоорондоо зай барих гэсэн энгийн гурван алхамыг хэвшил болгон баримталбал цар тахал болон дэгдээд буй коронавирусийн халдварыг вакцингүйгээр зогсоох боломжтой гэжээ.

Эдгээр энгийн дүрмүүдийг нийт хүн амын 90 хувь нь баримталж байж цар тахлаас ангижрах боломжтойг онцолжээ.

Мөн хэдий тухайн улсын Засгийн газар хорио цээрийн дэглэм тогтоосон ч иргэд нь хувийн арга хэмжээг ягштал баримтлахгүй бол өвчлөлийн оргил үеийг хойшлуулах ч халдварын тоог бууруулж чадахгүй гэж судалгааг хийсэн эрдэмтэд дүгнэжээ.

Судалгаанаас дүгнэхэд тухайн улс гурван сар хорио цээрийн дэглэм тогтоолоо гэж бодоход өвчний оргил үеийг долоо сараар хойшлуулах боломжтой аж. Иймд аль аль тал нь хамт хичээд, уялдаа холбоотой ажиллаж байж цар тахлыг зогсоох боломжтой юм.

Эх сурвалж: CNN