Нийслэлийн 129 дүгээр цэцэрлэгийн багш, ажилчид авлига авсан үндэслэлээр хуулийн байгууллагад шалгагдаж байсан эрхлэгч Ө.Алдармааг ажилд нь буцаан томилох шийдвэр гаргасныг эсэргүүцэн, жагсах болжээ.

Тус цэцэрлэгчийн багш, ажилчдын яриагаар Ө.Алдармаа нь нийслэлийн 129 дүгээр цэцэрлэгийн эрхлэгчээр 2014-2017 онд ажиллаж байсан бөгөөд энэ хугацаанд эцэг, эхчүүдээс хүүхдийг нь цэцэрлэгт авахдаа 500 мянган төгрөгийн хахууль авсан, хууль бус үйлдлийг нь хэлснийхээ төлөө багш ажилчид нь цалингаа хасуулах, ажлаасаа чөлөөлөгдөх зэрэг дарамт шахалтад ордог байжээ.

Хууль зөрчсөн үндэслэлээр өнгөрсөн хугацаанд шалгуулж байсан ч энэ асуудал нь шүүхээр эцэслэн шийдвэрлэгдээгүй. Гэтэл нийслэлийн Боловсролын газраас түүнийг 129 дүгээр цэцэрлэгийн эрхлэгчээр томилсон үйлдлийг багш, ажилчид эсэргүүцэж байгаа юм.

“Тэд хууль зөрчсөн хүнийг буцааж эрхлэгчээр томилж болохгүй. Хэрэв асуудлыг шийдвэрлэж, өөр хүнийг эрхлэгчээр томилохгүй бол өлсгөлөн зарлахаас аргагүй байдалд очно” гэлээ.

Г.ХОРОЛ