Сөүл-Улаанбаатар чиглэлийн тусгай үүргийн онгоц 17.10  цагт “Буянт-Ухаа” олон улсын нисэх буудалд газардлаа. Энэ удаагийн нислэгээр БНСУ-д ажиллаж, амьдарч байсан нийт 265 иргэн ийнхүү эх орондоо ирж байна. Тухайлбал,

• Бага насны хүүхэдтэй-38
• Жирэмсэн болон асран хамгаалагч-32
• Өндөр настан-20
• Хөгжлийн бэрхшээлтэй-6
• Эрүүл мэндийн шалтгаантай болон асран хамгаалагч- 30
• Хууль бусаар оршин суусан хэргээр саатуулагдсан -15
• Бусад хүндэтгэн үзэх шалтгаантай-124 иргэн байгаа юм.

Эдгээр иргэдийг ХӨСҮТ, Цэргийн төв эмнэлэг, Сэнтий, Токио инн, Эрхэс зочид буудалд тусгаарлана. Энэ удаагийн нислэг нь гадаадаас иргэдээ татан авч буй 37 дахь үүргийн нислэг бөгөөд долдугаар сард хийгдсэн 7 дахь нислэг болж байна.

СӨҮЛЭЭС 260 ИРГЭН ЭХ ОРОНДОО ӨНӨӨДӨР ИРНЭ

Сөүл-Улаанбаатар чиглэлийн тусгай үүргийн онгоц өнөөдөр /2020.07.20/ 08.47 цагт Улаанбаатараас хөөрчээ. Тус нислэгээр 260 иргэн эх орондоо ирэх бөгөөд 17.10 цагт “Буянт-Ухаа” олон улсын нисэх буудалд газардах хуваарьтай байна.

Үүний зэрэгцээ, маргааш /2020.07.21/ Улаанбаатар-Токиогийн чиглэлд тусгай үүргийн онгоц хөөрөх бол долдугаар сарын 26-нд Улаанбаатар-Франфурт чиглэлд Европд байгаа иргэдийг татан авна. Мөн нэмэлтээр долдугаар сарын 28, 29-нд Улаанбаатар-Сөүл чиглэлд дахин хоёр удаагийн нислэг үйлдэх бол долдугаар сарын 30-нд Улаанбаатар-Сидней чиглэлд нислэг үйлдэж, нийт 1470 иргэнийг татан авах юм.

А.АНИР