“Тоёота хүндэтгэлийн бэлгэдэл” гардуулах ёслол өнөөдөр /2020.07.13/ Сүхбаатарын талбайд боллоо. Жил бүрийн наадмын түрүү бөхөд хүндэтгэл үзүүлж, Тоёотагийн нэрэмжит шилжин явахгүй, зөвхөн түрүү бөхөд үлдэх “Тоёота цом” гардууллаа.

Мөн Тоёото компанийн зүгээс жил бүрийн наадмын түрүү бөхөд өгдөг автомашинаа энэ жилийн хувьд Нийслэлийн Эрүүл мэндийн газарт хандивлахаар болсон билээ. Тэгвэл өнөөдөр мөн түрүү бөхөд гардуулдаг байсан автомашинаа Нийслэлийн Эрүүл мэндийн газрын дарга Л.Төмөрбаатарт, 2020 оны Улсын наадмын түрүү бөх П.Бүрэнтөгсийн хамт гардууллаа.

ГЭРЭЛ ЗУРГИЙГ: Л.ЭНХ-ОРГИЛ

“ТОЁОТА ХҮНДЭТГЭЛИЙН БЭЛГЭДЭЛ” ГАРДУУЛАХ ЁСЛОЛ БОЛНО

2019 оноос эхлэн олон нийтийн санал хүсэлтийг үндэслэн наадмын түрүү бөхөд хүндэтгэл үзүүлэн Тоёотагийн нэрэмжит “Тоёота цом” гардуулах болсон. Өнгөрсөн жил ногоон гартаам суурьтай, уул, ус, үүлэн хээн дүрслэлтэй, мөнгөн аяга бүхий цомыг гардуулж байсан.

“Тоёота цом” шилжин явахгүй, тухайн жилийнхээ түрүү бөхөд насан туршид хадгалагдан үлддэгээрээ онцлогтой. Тиймээс ч энэ жил Монгол дарханы ур ухаанаас бүтсэн цалин мөнгөн “Тоёота хүндэтгэлийн бэлгэдэл”-ийг түрүү бөхөд гардуулах юм байна. Уг шагнал нь цалин цагаан мөнгөн дээр бидний эрт үеэс хүндэтгэн “Дөрвөн хүчтэн” хэмээн нэрлэж ирсэн хангарьд, луу, бар, арсланг дөрвөн талд нь зохиомжилж, дундаа бадамлан мандахыг бэлэгшээж алтан шар нарыг дүрсэлжээ. “Тоёота хүндэтгэлийн бэлгэдэл” гардуулах ёслол өнөөдөр /2020.07.13/ Сүхбаатарын талбайд болно.

Энэ жилийн хувьд дэлхий даяар Ковид-19 цар тахал дэгдсэнтэй холбогдуулан, хүчит бөхийн барилдааны түрүү бөхийн нэрэмжит Тоёота маркийн HIACE автомашиныг тахлын голомтод ажиллаж, ард түмнийхээ эрүүл мэндийг сахин хамгаалж буй нийслэлийн Эрүүл мэндийн газрын хамт олонд өгөхөөр болсон билээ.