Дэлхий нийтийг айдаст автуулаад буй цар тахлаас үүдэн энэ жил төрт ёсны уламжлал Үндэсний их баяр наадмыг үзэгчгүйгээр зохион байгуулахаар болсон. Энэ жил үзэгчгүй ч гэсэн өмнөх жилүүдтэй адил 3 тэрбум төгрөг зарцуулахаар төсөвлөөд буй. Өнөөдрийн байдлаар баяр наадмыг зохион байгуулахаар төлөвлөсөн 3 тэрбумаас 1.6 тэрбумыг зарцуулахаар төлөвлөн гүйцэтгэл санхүүжилт нь гарч байна.

Энэ талаар Үндэсний их баяр наадмыг зохион байгуулах комиссын дэд дарга, нийслэлийн Засаг даргын үүрэг гүйцэтгэгч Ж.Батбаясгалан “Үндэсний их баяр наадмыг хуулийн дор зохион байгуулдаг. 2020 оны наадмыг 3 тэрбум төгрөг зарцуулахаар төлөвлөсөн. Тус ажлыг есөн салбар хорооноос зохион байгуулдаг. Хороо тус бүр зохион байгуулалтын ажлуудаа хийж байна.

Наадмын өдрүүдэд коронавирустэй холбоотойгоор нийтэд үйлчлэх үйлчилгээ зохион байгуулах боломжгүй. Үйлдвэрлэл үйлчилгээ зохион байгуулагдахгүй. Иргэд "Хүй долоон худаг" руу зорчихгүй байх хэрэгтэй. Хамгаалалтын бүс рүү иргэдийг оруулахгүй.

Телевизийн сувгууд болон олон нийтийн сүлжээгээр дамжуулаад наадмын үйл ажиллагааг хүргэнэ” гэлээ. Тэрбээр хэдхэн хоногийн дараа болох монгол түмний уламжлалт Үндэсний их баяр наадмын бэлтгэл ажлын талаар өнөөдөр /2020.07.08/ танилцуулсан юм.

Жил жилийн Үндэсний их баяр наадмаар Сүхбаатар, Чингис хааны хөшөөнд цэцэг өргөж, дээлтэй монгол наадмыг зохион байгуулдаг уламжлалтай. Энэ жил цар тахлаас үүдэн дээрх арга хэмжээнүүдийг зохион байгуулахгүй юм байна. Мөн нийтэд үйлчлэх үйлчилгээ үзүүлэхгүй. Өөрөөр хэлбэл, цар тахлын үед Үндэсний их баяр наадмыг зохион байгуулж байгаа тул тодорхой хязгаарлалт хийж байгаа  юм. Энэ жилийн хувьд Үзэгчгүй наадмыг “13 дугаар зуун цогцолбор”-т зохион байгуулахаар болсон нь Хүй долоон худагт олон хүн нэг дор бөөгнөрхөөс сэргийлсэн гэх тайлбарыг албаны хүмүүс өгч байв.

ИРГЭД ТҮГЖРЭЛ ҮҮСГЭЖ ЦАГДААГИЙН АЛБА ХААГЧИД РУУ ДАЙРЧ ДАВШЛАХ ХЭРЭГГҮЙ

ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга, Цагдаагийн хурандаа Ж.АМГАЛАН:

Энэ жил бөхийн барилдаанд 800, шагай, сурын харваанд 1000 гаруй хүн оролцоно. Наадмын өдрүүдэд 13-р зуун, болон Хүй долоон худагт зөвхөн наадмыг зохион байгуулах комисс болон бөхчүүд, тамирчдыг нэвтрүүлнэ. Үзэгчгүй наадам болох тул жирийн иргэд болон тээврийн хэрэгслийг дотогш нэвтрүүлэхгүй. Наадмыг зохион байгуулах талбайг тойроод цагдаагийн алба хаагчид бүрэн хамгаалалтдаа авч ажиллана. Тиймээс иргэд тухайн хэсэгт түгжрэл үүсгээд, цагдаагийн алба хаагчид руу дайрч давшлах хэрэггүй. Энэ жил бүх зүйлийг нарийн цаг, хуваариар зохион байгуулах тул оролцогчид цагийг маш сайн баримтлаасай гэж хүсэх байна гэлээ.