Монголын жүдо бөхийн холбооны дэд ерөнхийлөгч Батбаярын Ариун-Эрдэнэд өнгөрөгч долдугаар сарын 5-ны өдөр жүдо бөхийн зургадугаар дан бүсийг гардуулан өглөө. Түүнд энэхүү бүсийг Монголын жүдо академийг үндэслэгч, жүдо бөхийн долдугаар дантай, жүдо бөхийн мастеруудын дэлхийн аварга ОУХМ Д.Батсайхан зүүж өгсөн бол өргөмжлөлийг Олон улсын жүдо бөхийн холбооны /IJF/ шүүгч нарын зөвлөлийн гишүүн, Монголын жүдо академийн удирдах зөвлөлийн дарга М.Бөхбат  гардуулжээ.

Уг арга хэмжээнд Монголын жүдо бөхийн холбооны дэд ерөнхийлөгч Н.Баттулга, Монголын жүдо бөхийн холбооны дэд ерөнхийлөгч Ж.Энхсайхан, Монголын жүдо бөхийн холбооны дэд ерөнхийлөгч Ц.Гэрэлт-Од, Сидней-2000, Афин-2004 зуны олимпийн наадамд оролцсон, Азийн наадмын мөнгө, жүдо бөхийн Азийн аварга шалгаруулах тэмцээн гурван хүрэл медальт, Монгол Улсын найман удаагийн аварга, ОУХМ Ц.Очирбат, жүдо бөхийн азийн аваргын мөнгөн медальт Монголын Тулааны Урлаг, Тулалдааны Спортын Холбооны ерөнхий нарийн бичгийн дарга, ОУХМ Г.Дашдаваа нарын эрхмүүд оролцсон аж.

Булган аймгийн Хутаг-Өндөр сумын харьяат ОУХМ Б.Ариун-Эрдэнэ нь жүдо бөхийн насанд хүрэгчдийн Монгол Улсын найман удаагийн аварга, жүдо бөхийн үнэмлэхүй жингийн аварга, Ази тивийн аварга шалгаруулах тэмцээний мөнгө, "Чингис хаан" дэлхийн цомын мөнгө, зүүн Азийн наадмын хүрэл, зүүн Азийн аварга шалгаруулах тэмцээний хошоо мөнгөн медальтай, 2003-2013 онуудын хооронд жүдо бөхийн холбоо, үндэсний шигшээ багийн гишүүн байжээ.