БНХАУ-ын дарга Ши Жинпинь Монгол Улсын эрх баригч МАН-тай харилцаа, хамтын ажиллагаагаа гүнзгийрүүлэх хүсэлтай байгаагаа Баасан гаригт /2020.07.03/ мэдэгджээ.

Тэрбээр МАН-ын дарга У.Хүрэлсүхэд хандсан мэдэгдэлдээ, Хятад-Монголын иж бүрэн стратегийн түншлэлийг улам хөгжүүлж, бүс нутгийн энх тайван, хөгжил цэцэглэлтэд хувь нэмрээ оруулахын тулд Хятадын Коммунист нам /ХКН/ МАН-тай бүх түвшинд, бүх салбарт харилцан солилцоо, хамтын ажиллагаагаа гүнзгийрүүлэх хүсэлтэй байгаагаа цохон тэмдэглэсэн байна. Түүнчлэн Хятад, Монгол нь уул, усаар холбогдсон найрсаг хөрш орнууд гэдгийг тэмдэглээд Covid-19 цар тахал дэгдсэнээс хойш хоёр тал коронавируст халдварын эсрэг нягт хамтран ажилласан нь хүнд хэцүүг хамтран даван туулж, бие биедээ харилцан туслах гүнзгий холбоотойг харуулсан явдал боллоо хэмээн хэлжээ.

Мөн У.Хүрэлсүх нь цар тахлын эсрэг дэлхий дахины тэмцэлд оруулж буй Хятадын хувь нэмрийг өндрөөр үнэлж буйд талархаад, Хятадын тал Монгол болон бусад оронтой цар тахлын эсрэг харилцан солилцоо, хамтын ажиллагаагаа гүнзгийрүүлж, эрүүл энх нийгмийг цогцлоох үйлсэд хамтран зүтгэхэд бэлэн байгаагаа илэрхийлсэн байна.

БНХАУ-ын дарга Ши Жинпинь цааш нь МАН, Монгол Улсын Засгийн газар болон Монголын нийгмийн бүхий л салбарын хамтын хүчин чармайлт нь Монгол Улс цар тахлаас урьдчилан сэргийлэх, хяналтад авах, эдийн засаг, нийгмийн хөгжлөө тогтвортой хадгалах гайхалтай үр дүнд хүргэж, парламентын сонгуулиа ч амжилттай зохион байгуулсанд баяртай байгаагаа илэрхийлжээ. Үүнээс гадна У.Хүрэлсүх ХКН үүсгэн байгуулагдсаны 99 жилийн ойгоор захидал илгээснийг дурдаад, ийнхүү захидал илгээсэн нь У.Хүрэлсүх болон МАН нь хоёр нам, хоёр орны харилцаанд өндөр ач холбогдол өгдгийг харуулсан явдал болсныг цохон тэмдэглэсэн байна.

Ши Жинпиньд илгээсэн У.Хүрэлсүхийн захидалд, ХКН-ын тууштай хүчин чармайлтаар Хятад улс цар тахлыг амжилттай дарж, иргэдийнхээ эрүүл мэндийг сахин хамгаалснаас гадна дэлхийн өнцөг булан бүрт байгаа хүмүүсийн эрүүл мэндийг хамгаалахад үнэтэй хувь нэмэр оруулсныг дурджээ. Мөн У.Хүрэлсүх нь сүүлийн жилүүдэд ХКН, МАН хоорондын солилцоо, хамтын ажиллагааны санамж бичгийн хүрээнд талуудын хамтын ажиллагааг бүх түвшинд амжилттай шинэ түвшинд хүргэсэнд баяртай байгаагаа илэрхийлээд цаашид хамтын ажиллагааныхаа ололт амжилтыг улам нягтруулж, хоёр орны харилцааг гүнзгийрүүлж, хөгжил цэцэглэлтийг ахиулна гэдэгт итгэж байгаагаа дурджээ.

Эх сурвалж: XINHUA