Covid-19 цар тахал дэлхийн улс орны эдийн засагт төдийгүй Монгол Улсын эдийн засагт томоохон сорилт болж байна. Халдварын тархалтыг хүн амын дунд дэгдээхгүйн тулд Монгол Улс өнгөрсөн хоёрдугаар сараас эхлэн өнөөдрийг хүртэл хөл хорионы дэглэмийг сахиулж байгаа билээ. Энэ хугацаанд иргэд, аж ахуй нэгжүүдийн орлого буурч, улмаар үүдээ хаах, хүн амын дунд ажилгүйдэл бий болж эхэлсэн. Иймээс эдийн засгийг эрчимжүүлэх, ажилгүйдлийг бууруулах зорилгоор Монгол Улсын Засгийн газар хэд, хэдэн арга хэмжээ авч эхэлсэн. Ингэхдээ иргэд, аж ахуй нэгжийн хэрэглээний болон ипотекийн зээлийн төлөлтийг хойшлуулах, харилцах дансанд хүү тооцохгүй байх, онлайн гүйлгээний шимтгэлийг 60 төгрөгөөр бууруулав. Энэ нь иргэд, аж ахуй нэгжид тодорхой хэмжээний дэмжлэг болж байгаа ч банкны салбар эргэлтийн хөрөнгөгүй болох эрсдэлтэй нүүр тулсан юм. Тодруулбал, цар тахлын нөлөөгөөр банкны зээлийн хугацаа хэтрэлт огцом өсчээ. Монголын банкны холбооны гаргасан тайланд дурдсанаар, 2020 оны дөрөвдүгээр сарын байдлаар хугацаа хэтэрсэн зээл 35 хувиар өссөн байна.

Мөн цар тахлын нөлөөгөөр, иргэд, аж ахуй нэгж орлогогүй болж байгаатай зэрэгцэн, банкууд зээлийн шалгуураа өндөрсгөж эхлэв. Тодруулбал, боловсруулах, барилга, ХАА-н салбарт олгосон зээлийн хэмжээ 2020 оны дөрөвдүгээр сарын байдлаар буурчээ. Мөн цалин, тэтгэврийн зээл олголт огцом буурсан байна. Гэхдээ банкны салбарын олгосон зээлийг салбараар нь авч үзвэл худалдааны салбарын зээл 8.3 хувиар өссөн байна.

Covid-19 цар тахал валютын ханшийн өсөлтөд огцом нөлөөлж буй. Энэ үзэгдэл нь Монгол улс төдийгүй дэлхийн улс орнуудад ч хүчтэй цохилт болж байна. Өнөөдрийн байдлаар Монгол Улсад ам.долларын ханш 2826 төгрөг, юанийн ханш 400 төгрөгтэй тэнцэж байна. Тэгвэл банкны салбарт валютын хадгаламж 31 хувиар өссөн бол валютын харилцах данс мөн өсөлттэй гарчээ. Харин төгрөгийн хадгаламж 4 хувиар буурсан байна.

Мөн цар тахалтай холбоотойгоор интернет банкны хэрэглээ иргэдийн дунд өсчээ. Тодруулбал, өнөөдрийн байдлаар интернет банк хэрэглэгчдийн тоо тасралтгүй өсч, 2.1 саяд хүрсэн бол мобайл банкны үйлчилгээ хэрэглэгчдийн тоо буурч, 1.2 саяд хүрэв.