Ховд аймагт 27 настай иргэн тарваган тахлын уушигны хэлбэрээр өвчилсөн болох нь батлагдсан. Түүний нэг хоёрдугаар хавьтал болох 650 хүн байгаа бөгөөд нэгдүгээр хавьтал болох төрсөн дүүд нь мөн тарваган тахал илэрчээ. Тиймээс тус аймгийн Жаргалант, Цэцэг сумдад тодорхойгүй хугацаагаар хөл хорио тогтоогоод байгаа талаар бид өмнө нь мэдээлсэн.

Одоогоор 27 настай иргэний биеийн байдал хүнд байгаа юм байна. Тэрбээр аймгийн нэгдсэн эмнэлэгт эмчлүүлж байгаа юм. Харин түүний дүү болох 17 настай иргэний биеийн байдал дунд байгаа аж. Түүнийг Цэцэг суманд эмчилж байгаа гэнэ. Дээрх тохиолдлын нэгдүгээр хавьтал 146, хоёрдугаар хавьтал 504 хүн байна. Нэгдүгээр хавьтал болох 146 хүнийг эмнэлэгт тусгаарлаж, антибиотик эмчилгээнд оруулжээ.

Мэрэгч амьтдаас хүнд халдварладаг гоц аюулт халдварт өвчин болох тарваган тахлаас урьдчилан сэргийлж, тарвага агнахгүй байх, тарваганы эд эрхтнийг түүхийгээр нь хэрэглэхгүй байхыг мэргэжилтнүүд зөвлөж байна.

Р.ДУЛАМ