Бээжин, Шинэ Дели аль аль нь “манайх” хэмээдэг Кашмирын Галван хөндийд Энэтхэг, БНХАУ-ын цэргүүд хоорондоо байлдаж, Энэтхэгийн дор хаяж 20 цэрэг амь үрэгдлээ хэмээн Энэтхэгийн арми мэдээлжээ. Харин БНХАУ-ын талаас энэ талаар ямар ч тайлбар хийгээгүй байна.

Энэтхэгийн арми анх мөргөлдөөнд нэг офицер, хоёр цэрэг амь үрэгдсэн гэж мэдээлсэн ч удалгүй хүнд шархадсан гэх 17 цэрэг нас барсан талаар нэмж мэдээлжээ. Энэтхэгийн хэвлэлүүдээр тус мөргөлдөөнд Хятадын ардын чөлөөлөх армийн 43 орчим цэрэг амь үрэгдсэн, хүнд шархадсан хэмээн мэдээлж байгаа ч БНХАУ-ын талаас хараахан мэдээлэл өгөөгүй байна.

Харин БНХАУ-ын "Глобал Таймс" сонины эрхлэгч Ху Шижин өөрийн твиттер хуудастаа “БНХАУ-ын тал хоёр орны хүмүүсийг төөрөгдүүлэхийг хүсэхгүй байна. Би энэтхэгчүүдэд хандаж хэлье. Болсон үйл явдлаас болж Хятадыг хүчгүй гэж битгий эндүүрээрэй. Хятад элдэв мөргөлдөөн хүсэхгүй байгаа. Гэхдээ бас айхгүй байна” хэмээн жиргэжээ.

Харин Энэтхэгийн Гадаад хэргийн сайд “БНХАУ-ын тал тохиролцоогоо дагасан бол хоёр тал ийм их хохирол амсахгүй байх байлаа. Энэ мөргөлдөөн Хятадын цэргүүд хүрээгээ тэлж, давшихаар оролдсоноос болсон” хэмээн хэлжээ.

Тус маргаантай газрыг энэтхэгчүүд зүүн Ладах хэмээн нэрлэдэг бол хятадууд Аксай Чин хэмээдэг аж. 1947 онд тусгаар тогтнолоо зарласны дараа тус газар Энэтхэгийн Кашмир мужийн нэгэн хэсэг хэмээгдэж байсан юм. Гэвч өдгөө энэ газар нь Хятадаас гадна Пакистантай бас маргаан үүсгэж байгаа юм.

Тус хэсэгт хэд хэдэн стратегийн ач холбогдол бүхий уулын гарц, Шиньжян, Төвөдийг холбосон хурдны замтай. 1962 онд Энэтхэг тус хэсгийг эзэлж авахаар оролдсон ч сар үргэлжилсэн дайн Хятадын ялалтаар дуусч байжээ.

Эх сурвалж: RT.COM