Тайландын шүүх далайн хоолны газрын хоёр эзнийг залилан үйлдсэн хэмээн тус бүр 1446 жил хорих ял шийтгэжээ.

Лэймгэйт нэртэй далайн хоолны газар өнгөрсөн жил цахим орчинд шинэ, сайжруулсан хоолнуудынхаа ваучерыг заржээ. Тус ваучерыг нийт 20 мянга орчим хүн 50 сая тайланд бат буюу 1.6 сая ам.доллараар худалдан авсан байна.

Гэвч удалгүй тус хоолны газар нийлүүлэлт хүрэлцээгүй байна гэх шалтгаан хэлээд, хаалгаа барьжээ. Улмаар худалдан авагчид цагдаад гомдол гаргасан тул хоолны газрын эзэд болох Апичарт Боуорнбанчарак, Прапассорн Боуорнбанча нарыг баривчилжээ.

Тайландын хуульд залилангийн хэргийн дээд ял 20 жил гэдэг ч энэ мэт олон хохирогчтой хэрэгт ийм урт хугацааны хорих ял оноох нь цөөнгүй тохиолддог гэнэ.

Хоолны газрын эздийг шүүх залилангийн 723 хэрэгт буруутган, 1446 жилийн хорих ял оноосон ч гэм буруугаа хүлээн уучлал гуйсан тул ялыг хоёр дахин хөнгөлж, 723 жил болгожээ. Гэвч бодит байдал дээр энэ мэт олон жилийн хорих ял авсан залилангийн хэрэгтнүүд дээд тал нь 20 жил болоод шоронгоос суллагддаг аж.

Мөн тэдний компанийг 1.8 сая батаар торгож, хамтран эзэмшигчдээс хохирогчдын хохирлыг барагдуулан 2.5 сая бат тушаахыг даалгажээ.

Өмнө нь 2017 онд Тайландын шүүх нэгэн залилангийн хэрэгтэнд 13 мянган жил хорих ял сонсгож байсан удаатай билээ.

Эх сурвалж: BBC.COM