Эрүүл мэндийн яамнаас өнөөдөр /2020.06.03/ коронавируст халдварын нөхцөл байдлын талаар цаг үеийн ээлжит мэдээллэ өглөө. Өчигдөр шинээр 20 хүн эмнэлгийн ажиглалтад орсон байна. Одоогоор 1812 хүн тусгаарлалтад байна. Архаг хууч өвчтэй 116 хүн эмнэлгийн ажиглалтад байгаа гэв. Мөн орон нутгийн 14 чиглэлийн галт тэргэнд таван мянга гаруй иргэнд тандалт хийсэн.

ЭМЯ-ны 24 цагийн 119 шуурхай утсанд хандсан иргэдээс олон нийтийн газар амны хаалт зүүхгүй байна гэсэн гомдол мэдээлэл ирүүлсэн байна. Тус яамны Тандалт шуурхай удирдлагын хэлтсийн дарга Д.Нарангэрэл “Бидний эргэн тойронд коронавируст халдварын аюул ойрхон байна. Иймд иргэд сонор сэрэмжээ алдахгүй, амны хаалтаа тогтмол зүүхийг зөвлөе. ОХУ-тай хил залгаа Увс, Сэлэнгэ, Баян-Өлгий аймгийн иргэд онцгой анхаарал сэрэмжтэй байх хэрэгтэй” гэлээ.

ХӨСҮТ:

-Өчигдөр нийт 374 хүнд шинжилгээ хийхэд коронавирус илрээгүй, сөрөг гарсан. Сэлэнгэ аймгийн Алтанбулаг боомтоор орж ирсэн 29 жолоочоос коронавирус илрээгүй. Нийт 185 тохиолдлоос 44 хүн эдгэж, тусгаарлалтад байна. Эмнэлэгт байгаа хүмүүсийн биеийн байдал тогтвортой, 118 хүн хөнгөн, 23 хүн хүндэвтэр байгаа бөгөөд дунджаар  30 хоног эмчлэгдэж байна. Насны хувьд 5-80 настай хүмүүс коронавирус туссан байна.

ӨВЧЛӨЛ БҮРТГЭГДСЭН БҮС НУТГААС ОНЛАЙН ЗАХИАЛГА ХИЙХЭЭС ТАТГАЛЗ

ЭМЯ-ны Тандалт шуурхай удирдлагын хэлтсийн дарга  Д.НАРАНГЭРЭЛ:

-Манай орны хувьд сэтгүүлчдийг эрсдэлт бүлэг гэж үздэг тул тавдугаар сарын сүүлчээр коронавируст халдварыг илрүүлэх урьдчилсан шинжилгээнд хамруулахад сөрөг гарсан.  Иймд сэтгүүлчид аль болох урт микрофон барих, зай барьж сурвалжлага бэлтгэхийг зөвлөж байна.  Бид тусгай үүргийн нисэх онгоцоор ирэх иргэдийг хүлээн авахад бэлтгэлээ хангаж байна. Эрүүл мэндийн байгууллагуудын бэлэн байдлаа ханган ажиллаж байна. Дэлхийн улс орнуудад цахимаар эд зүйлс худалдан авах онлайн худалдаа ихэссэнтэй холбоотойгоор иргэдэд аль болох өвчлөл бүртгэгдсэн бүс нутгаас захиалга хийхгүй байхыг зөвлөж байна. Ачаа тээвэр хүлээн авсан тохиолдолд бээлий өмсөх, тээшийг савантай бүлээн ус, близнагаар ариутгаж халдваргүйжүүлэхийг зөвлөе гэлээ.

ХӨСҮТ-Д  ЭСРЭГ БИЕИЙГ ИЛРҮҮЛЭХ ОНОШЛУУРААР  ШИНЖИЛГЭЭ ХИЙНЭ

Халдварт өвчин судлалын үндэсний төвд өнөөдрийн байдлаар 178 хүн хэвтэн эмчлүүлж байна. Коронавируст халдварын батлагдсан 185 тохиолдлоос 44 нь эдгэж, дараагийн хяналт руу шилжжээ.  Тэдний 16 нь сувилалд, 13 нь гэрт, 15 хүний  ажиглалтын хугацаа дууссан  байна. Дашрамд дурдахад, Германы Росфирмийн иммунологийн бүрэн автомат анализатораар хүний илдэс ба сийвэн дэх  сарс болон коронвирусийн эсрэг биеийг илрүүлэх 99,8 хувийн өвөрмөц 100 хувийн мэдрэг чанар бүхий оношлуурыг гаргасан. Энэхүү оношлуурыг ашиглах ХӨСҮТ-д шинжилгээ хийх бэлтгэл хийж дууссан ба ийнхүү гурав дахь лаборатори өнөөдрөөс эхлэн ажиллаж байна.