Оросын хөлбөмбөгийн Премьер лигийн Локомотив Москва багийн дөрвөн тамирчин шинэ коронавирусийн халдвар авсан нь тогтоогджээ. Тус багийн зүгээс мэдэгдэл хийн Дмитрий Баринов, Антон Коченков, Тимур Сулейманов, Роман Тугарев нарыг халдвар авсныг баталж ямар нэгэн шинж тэмдэггүйгээр тусгаарлагдаж байгаа хэмээжээ.

Энэ сарын эхээр Локомотив багийн довтлогч Жеферсон Фарфан мөн шинэ коронавирусийн халдвар авсан нь тогтоогдсон билээ.

ОХУ-ын спортын сайд Олег Матыцин ирэх долдугаар сарын 21-нээс хөлбөмбөгийн лигүүдээ үзэгчтэй зохион байгуулахыг зөвшөөрсөн бөгөөд гол нь цэнгэлдэхийн нийт суудлын 10 хүртэлх хувьд л үзэгчдийг суулгах ажээ.

Олег Матыцин энэ тухай “Хөлбөмбөгийн тоглолтуудаа бага ч гэсэн үзэгчидтэй явуулах нь чухал. Би Германы Бундеслигийн тоглолтуудыг үзсэн. Үзэгчгүй цэнгэлдэх нь нэг л уйтгартай. Хангалттай ч эмоци байгаагүй. Үзэгчгүй тоглох нь бидний арга барил биш”  хэмээжээ.

Одоогийн байдлаар Оросын Премьер лигийг Зенит Санкт-Петербург баг 22 тойргийн дараах байдлаар 50 оноотой тэргүүлж байгаа бол тэдний араас Локомотив Москва болон Краснадор багууд удаалж байна.