"News" агентлаг 2020 оны сонгуулийн тойрог бүрийн нэр дэвшигчдийн талаарх мэдээллийг хүргэж байгаа билээ. Энэ удаад сонгуулийн  тавдугаар тойрог буюу  Говь-Алтай аймгийг онцоллоо.

Аймгийн төвийн 21 мянган иргэний хувьд хамгийн тулгамдсан асуудал гэвэл ус. Говь-Алтай гэхээр хүн бүр ус муутай аймаг гэж төсөөлдөг. Үүнийг дагаад шилжилт хөдөлгөөн ч ихэсч байгаа. Сонгуулийн нэр дэвшигч бүрийн ярьдаг амны уншлага нь говь-алтайчуудын усны асуудлыг шийднэ гэж ярьсаар ирсэн. Тус аймгийн усны асуудал өнөөдрийг хүртэл бүрэн дүүрэн шийдэгдээгүй.

Говь-Алтай аймагт есөн нам эвслээс 14 нэр дэвшигч хоёр мандатын төлөө өрсөлдөнө. Алтайчууд бол Ардын намын улаан фенүүд, тэд УИХ-ын сонгуулийг нэг ч удаа “цэнхэртүүлж” байгаагүй юм. Хүн ам цөөн гэдэг шалтгаанаар 2016 оны УИХ-ын сонгуулиар хоёр байсан мандатыг нэг болгосон билээ. Ингээд өнгөрсөн дөрвөн жил  ганцхан гишүүн Говь-Алтайчуудыг төлөөлсөн.  Тэр нь УИХ-ын гишүүн Ш.Раднаасэд байв.

КАБИНЫ САЙДЫН ХАМТ Ш.РАДНААСЭД ДӨРӨӨ НИЙЛЭВ

Тэгвэл 2020 оны сонгуулиар эрх баригч нам Говь-Алтай аймагт нэмж нэг мандат хуваарилсан нь МАН-ын генсек Д.Амарбаясгаланд зориулсан гэж байв. Харамсалтай нь, генсек Д.Амарбаясгалан ЖДҮ-д холбогдсон өөр бас бус хэл аманд өртсөн тул нэр дэвших эрхээсээ мултарсан. Оронд нь Зам тээврийн хөгжлийн сайд Б.Энх-Амгаланг Ш.Раднаасэдийн хамтаар сойв. Сайд Б.Энх-Амгалан “Мишээл экспо”-гийн захирал гэдгээрээ илүүтэй танигдсан. Тэрбээр Алтай хотод төрж өссөн ч 2016 оны УИХ-ын сонгуулиар Хан-Уул дүүргээс УИХ-ын гишүүнээр сонгогдсон. 2017 оны Ерөнхийлөгчийн сонгуулийн сурталчилгааны үеэр М.Энхболд даргыгаа мэтгэлцээнд бэлтгэх үед өрсөлдөгч С.Ганбаатар болж жүжиглэж байсан нь тухайн үеийн бичлэгээс ил болсон. УИХ-ын даргыг огцруулах бичигт гарын үсгээ зурснаар өдгөө У.Хүрэлсүхийн фракц болсон. Энэ ч утгаараа Ерөнхий сайд У.Хүрэлсүхийн танхимд нь хамгийн сүүлд орж ирсэн сайд нарын нэг нь. 2016 оноос хойш Зам тээврийн хөгжлийн яам гурав дахь сайдын нүүрийг үзсэн нь Б.Энх-Амгалан байв.

Тэрбээр “Энэ салбарт шинэ хүн биш. Би жолоочийн хүүхэд" хэмээн хэлсэн нь хэсэгтээ л онигоонд орсон. Улстөрчийн хувьд нэг их онцгойроод байдаггүй, хурц характергүй, даруухан улстөрч. ЗТХ-ийн сайдаар очоод онц содон хийсэн ажил гавьяа алга. Дарханы замаа засаж дуусаагүй атал  нийслэлд “Тэнгэрийн зам” барина гэж үлгэр ярьж мөн л онигоонд орсон. Хаа нэг гаргах шийдвэр, санал  нь эргээд түүнийг байдалд оруулдаг. Ер нь хамгийн их онигоонд ордог сайд гэж хэлж болно. Хан-Уул дүүргийн тойрогт өрсөлдөгчид чанга учраас энэ сонгуулиар тэр нутгаа бараадсан бололтой. Гэхдээ нутагтаа хэр нэр нүүр, нөлөөтэйг нь хэлэхэд бэрх. Бодвол горьдлого тээсэн болоод л өөрөө ч тэр, нам нь тэр нутгийг нь бараадуулжээ.

Түүнтэй хамт дөрөө нийлүүлсэн Ш.Раднаасэдийн хувьд 2016 оны сонгуулиар анх удаа УИХ-д сонгогдсон. Тэрбээр өнгөрсөн дөрвөн жилд томоотой даруу байсангүй, хоёр ч том асуудалд ороолцолдсон. Нэг нь УИХ-ын Хууль зүйн байнгын хорооны дарга байхдаа хөөн хэлэлцэх хугацааг богиносгож, цагаан захтнуудыг хэргээс мултрах боломж олгосон гэж хэсэгтээ буруутгагдсан. Гэхдээ үүнийгээ өөрөө хүлээн зөвшөөрдөггүй.

Хоёр дахь муу нэр зүүсэн нь Ааяа нэрээрээ Мэргэжлийн хяналтынхантай нэвт шувт холбоотой гэгддэг. Тэрбээр 2014-2015 онуудад  МХЕГ-ын даргаар ажиллаж байсан. Их хэмжээний мөнгө “оймсддог” нөхрийн ард түүнийг бий, авлигынх нь 10 хувийг авсан гэсэн шуугианд нэр холбогдсон. Ш.Раднаасэд тойрогтоо тийм ч сайн нэртэй биш, гишүүн болсныхоо дараа хэсэгтээ л тойргоо эргэж тойрохоо мартсан гэдэг.

АН-ААС О.АМГАЛАНБААТАР “ХАТУУ” ӨРСӨЛДӨГЧ

МАН-ын хоёр нэр дэвшигчийн эсрэг АН-аас О.Амгаланбаатар, О.Батханд нар өрсөлдөнө. Аль, аль нь улс төрд хүч үзэж буй шинэ хүмүүс. О.Амгаланбаатарын тухайд өмнө нь Говь-Алтай аймгийн Засаг даргаар ажиллаж байсан. Өнгөрсөн 2016 оны сонгуулиар Ш.Раднаасэдтэй өрсөлдөж, өвдөг шороодсон тэрбээр энэ жил дахин даагаа нэхнэ. Гэхдээ МАН-ын нэг биш хоёр хүнтэй өрсөлдөнө. Түүнийг МАН-ынхан чанга өрсөлдөгчөө гэж харж байгаа. Учир нь тэр 2016 оны сонгуулиар чамлахааргүй санал авсан. Өнгөрсөн дөрвөн жил аймагтаа амьдарч байсны хувьд тойргоо сайн усалсан, мөн Засаг даргаар ажиллаж байсан тул нутагтаа нэлээд танигдсан нь тодорхой.  Аймгийн Засаг даргаар ажиллаж байхдаа цэвэр усны саван дээр нэрээ "сийлж", тарааж байсан нь сошиалд багагүй шүүмжлэл дагуулсан,  хэл аманд өртөмтгий гэж хэлж болно. Саяхан гэхэд л олон хүүхэнтэй, олон мянган ам.долларын цаг зүүдэг гэсэн мэдээлэл гарсан ч уг мэдээллийг О.Амгаланбаатар үгүйсгэж тайлбар хийсэн.

УИХ-ын Тамгын газрын даргын алба хашиж байсан сэтгүүлч О.Батханд АН-аас Говь-Алтай аймагт нэр дэвшсэн.  Сэтгүүлчийн гараагаа ТВ9 телевизээс эхлүүлж, УИХ-ын Тамгын газрын даргын алба хашиж байсан. Түүнийг АН-ын даргын зөвлөх З.Энхболдын  “хүн” гэдэг. Сэтгүүлч О.Батханд “Зундуйн Дорж” сангийн тэргүүнээр ажиллаж, энэ хүрээнд мал сүргийг  хамгаалах, малчдыг дэмжих, тэдний дуу хоолойг сонсох, олон нийтэд хүргэх зорилготой ажилладаг. Тиймээс малчдаас багагүй санал цуглуулж магад. Ялангуяа өнгөрсөн жил З.Нарантуяа гишүүнтэй хамтран малын хулгайтай тэмцэж,  хуулийг нь  чангаруулах тал дээр хамтарч ажиллаж байсан.

ГУРАВДАГЧ ХҮЧНҮҮДЭД ОРОН ЗАЙ АЛГА

Гуравдагч хүчнүүдээс нэр дэвших 10 нэр дэвшигчийн тухайд  “Та бидний эвсэл” С.Батбаатар, Б.Оюунбилэг, “Хөгжлийн хөтөлбөр” нам Г.Дондовсамбуу, “Шинэ эвсэл” Н.Чулуунжав, Э.Эрдэнэтуяа, Сахигтун Үндсэн хуулийн эвсэл” Н.Бүргэдаа, Э.Төгссайхан, “Эрх чөлөөг хэрэгжүүлэгч нам” Д.Ганхуяг, Зон олны нам” Ц.Амарзаяа  нар өрсөлдөнө. Тэд бүгд шинэ хүмүүс, төдийлөн олон нийт танихгүй учир Говь-Алтай аймагт гол өрсөлдөөн МАН, АН хоёрын дунд явагдах нь тодорхой.