Авлигатай тэмцэх хөтөлбөрийг хэлэлцэхийг дэмжив | News.MN - Мэдээллийн эх сурвалж

Авлигатай тэмцэх хөтөлбөрийг хэлэлцэхийг дэмжив

Хуучирсан мэдээ: 2015.12.17-нд нийтлэгдсэн

Авлигатай тэмцэх хөтөлбөрийг хэлэлцэхийг дэмжив

УИХ-ын чуулганы нэгдсэн хуралдаанаар Монгол Улсын Ерөнхийлөгчийн санаачилсан Авлигатай тэмцэх, хариуцлага, шударга ёсыг бэхжүүлэх үндэсний хөтөлбөрийг батлах тухай УИХ-ын тогтоолын төслийг хэлэлцээд гишүүдийн 64.3 хувийн саналаар дэмжиж, анхны хэлэлцүүлэгт бэлтгүүлэхээр холбогдох байнгын хороонд шилжүүллээ.

Монгол Улс авлигатай тэмцэх хөтөлбөрийг анх 2002 онд баталж байсан бол хэрэгжилт нь 2010 онд дуусчээ. Анхны хөтөлбөр нь тунхагийн шинж чанартай байсан ч авлигатай тэмцэх тусдаа байгууллагатай болсон байдаг аж. Өргөн барьсан төсөлд Монголын авлигатай тэмцэх зургаан жилийн хөтөлбөр тусчээ. Ингэхдээ энэ чиглэлээр Ерөнхийлөгч, УИХ, Засгийн газар, иргэний нийгмийн байгууллага, хэвлэл мэдээлэл яаж оролцох вэ гэдгийг өргөн хүрээнд хамруулж өгсөн байна.

Мөн хуралдаанаар Гааль, Татварын ерөнхий газрын эрх зүйн байдлын тухай болон холбогдох бусад хуулийн төслүүдийг хэлэлцээд гишүүдийн 64.2 хувийн саналаар төслийг хэлэлцэх нь зүйтэй хэмээн үзлээ.

УИХ-аас 2016 оны төсвийн хуулийг батлахдаа Гааль, Татварын байгууллагыг нэгтгэх шийдвэр гаргасан юм. Ингэснээр 2016 оны нэгдүгээр сарын 1-нээс тус хоёр байгууллага нэгдэж ажиллана. Үүнтэй холбоотой хуулийн зохицуулалт дээрх төсөлд багтжээ.

Г.ДАРЬ

 

"Болор дуран"-аар шалгав.

0 сэтгэгдэл

News.mn сайтад сэтгэгдэл оруулахад анхаарах зүйлс

МЭРГЭЖИЛТНЙ ҮГ 2015-12-17 122.201.22.87

Гааль, татварын хуулийн төсөлд чинь энэ байгууллагын удирдлагыг шударгаар сонгон шалгаруулж, чадвартай, ёс зүйтэй хүн томилох механизм алга байна лээ. Нөгөө л хуучнаараа, улс төрийн нам, том албан тушаалтны танил талын хүн томилогддог одоогийн поактик хэвээрээ байх нь байна гэж ойлгогдохоор байна лээ. Төрийн албаны зөвлөлийнхний саналыг ав л даа . Тэд нэг үндэслэлтэй санал, зөвлөгөө өгнө байлгүй.Энэ салбарт ажиллаж байгаа удирдах, гүйцэтгэх тушаалын албан хаагчдын аль аль нь авлигад өртөх эрсдэлтэй байдгаараа бусад салбарынхаас онцлог байдаг. ЭНЭ ТАЛААС НЬ АНХААРААД ТАНИЛ ТАЛААРАА БИШ, ЧАДВАРТАЙ, ЁС ЗҮЙТЭЙ ХҮНИЙГ ШУДАРГААР СОНГОН ШАЛГАРУУЛЖ ТОМИЛОХ МЕХАНИЗМЫГ энэ хуульдаа суулгах хэрэгтэй. Наад хуулийн төслийг чинь салбарын хүмүүс нь боловсруулждээ янз нь. Тэд хэзээ ч ийм механизм суулгахыг хүсэхгүй. Тэгэхлээр УИХ л оролцож, энэ талын бодлогоо суулгах хэрэгтэй.Төрийн албаны хараат бус шинжээч Ш.Раднаа