Зургадугаар сарын 1-нээс дотоодын аялал жуулчлалыг үе шаттайгаар сэргээнэ хэмээн ОХУ-ын Ерөнхий сайдын орлогч Дмитрий Чернышенко мэдэгдлээ.

Коронавирусийн цар тахал ОХУ-ын эдийн засагт хүнд цохилт авчирсныг тэрбээр онцоллоо. Түүний хэлснээр одоогийн байдлаар эдийн засагт учирсан хохирол 3,5 их наяд рубль болоод байгааг Дмитрий Чернышенко хэллээ.

"Цар тахлын улмаас тогтоосон хязгаарлалтуудыг зургадугаар сарын 1-нээс үе шаттайгаар сулруулахаар төлөвлөж байна. Аялал жуулчлалын салбарын хувьд эхний ээлжинд эрүүл мэндийн үйлчилгээ үзүүлдэг сувиллуудыг нээх төлөвлөгөөтэй байна. Дараагийн шатанд зочид буудлууд, амралтын газрууд, наран шарлагын газрууд, хөлөг онгоцны аялал зэргийг нээнэ” хэмээн Чернышенко хэллээ.

Дотоодын аялал жуулчлал идэвхждэг зуны улиралд халдвар тархахгүй байх аюулгүй нөхцөл байдлыг хангах замаар дотоодын аялал жуулчлалыг сэргээнэ хэмээн тэр хэллээ.

Эх сурвалж: РИА НОВОСТИ