Амьд аялгуу эргэн ирлээ

Хүн төрөлхтний хөгжим буцаад Beatles рүүгээ орж байна. Пентатоник академийн ерөнхийлөгч, хөгжмийн зохиолч Б.Долгионы хэлснээр “Хүн чихэнд нь ямар хөгжим сонсогдох боломжтой бүгдийг туулаад өнгөрлөө. Өнөөдөр аялгуу алдагдаж, утга учир нь олдохгүй болж байна. Харин сүүлийн үеийн хандлага нь натур руугаа буцан орж, жинхэнэ амьд хөгжмийг сонсох соёл эргэн ирж байна. Энэ соёлыг түгээх ажлыг санаачилж, хэрэгжүүлж байгаад баяртай байна. Пянзны хөгжмийн шум, зүү нь үсэрч харайж байх чимээ нь хамгийн гоё, энэ бол амьдрал” юм.

2015 оны 12 сарын 11-нд PC mall-ийн 2-р давхарт урлаг соёлын олон эрхэм цугласан нь тэдний сонирхлыг нэгтгэсэн пянз тоглуулагчны дэлгүүрийн нээлт болсон явдал юм.

80-аад оны пянзны соёл дэлгэрсэн оргил үеийн төлөөлөл цуглаж, амтат кофе ууж, шог зураач Цогтбаярын пянзны цуглуулганаас сонсч, энэхүү үдшийг аналог хөгжмөөр амьсгалж өнгөрүүллээ.

Пянзны амьд дуугаралтын таашаал, ховор нандин пянз цуглуулах хобби улам бүр залуужсаар байгааг энэ үдэш цугласан зочдоос харж болно. Хөгжмийн ертөнцийн бичлэгийн формат дахь хувьсал өөрчлөлтийн үед хамгийн тогтвортой байж, одоо ч үнэ цэнээ алдаагүйгээр барахгүй улам дэлгэрч сэргэж байгаа төрөл бол яах аргагүй пянз бичлэг. Энэ нь дуугаралтын хувьд хамгийн үнэн зөв цэвэр гаргалгаа болох аналоги төрөлтэй нь шууд хамааралтай. Хадгалалтын хувьд ч нөхцлийг нь зөв хангавал 100-аас ч дээш жил хадгалж болох нь батлагдсан байдаг.