Ардчилсан нам 2020 оны сонгуульд нэр дэвшигчдээ тодруулахдаа олны нүдийг орой дээр нь гаргасан олон хачирхалтай шийдвэр гаргав. Тухайлбал, БСШУС-ын сайд асан Лу.Гантөмөр энэ удаагийн сонгуульд нэр дэвшсэнгүй. Дэвшсэнгүй юу, дэвшүүлсэнгүй юу гэдэг асуулт олон нийтийн дунд гайхаш төрүүлж байна.

2012 оны сонгуулийн дараа Ардчилсан нам олонх болж, “Шинэчлэлийн” Засгийн газрыг бүрдүүлэхэд Лу.Гантөмөрийг БСШУС-ын сайдаар ажиллахыг урьж байсан юм. Тэгвэл өнгөрсөн дөрвөн жилийн турш АН-ын шинэчлэлийн үйл хэрэгт оролцож, АН-ын лидерүүдийн нэг тэр ийнхүү намаасаа шахагдав уу.

Ингэж харах утга бүхий үгийг тэрбээр өчигдөр /2020.05.18/ өөрийнхөө нүүр номдоо “Өс биш бодлого зангидъя” хэмээн зургаа оруулжээ. Мөн зарим мэдээллийн хэрэгслээр түүнийг ШИНЭ намаас нэр дэвшиж магадгүй гэсэн мэдээлэл ч гарав. Энэ тухай БСШУС-ын сайд асан Лу.Гантөмөрөөс тодруулахад үгүйсгэлээ. Тэрбээр “Намынхаа шийдвэрийг гайхаж байгаагаа хэлээд, намын нөхдөө сонгуульд нь дэмжиж, тусална” гэв.

Түүний хувьд парламентад гурван удаа түмний итгэлээр сонгогдож, үүргээ нэр төртэй биелүүлж ирсэн  төрийн түшээ билээ.