Коронавируст цар тахлын талаар мэдээ, мэдээллийг бүхий л сувгаар минут секундийн нарийвчлалтайгаар хүмүүст хүрч байна. Цар тахалтай холбоотой мэдээ мэдээллүүд нь хүмүүсийн сэтгэцийн эрүүл мэндэд сөргөөр нөлөөлж болзошгүй байгаа учир улс орнууд коронавирусийн эсрэг тэмцэхийнхээ хажуугаар ард иргэдийнхээ сэтгэцийн эрүүл мэндийг хамгаалах тал дээр анхаарал хандуулахыг НҮБ-аас уриалжээ.

Хүмүүс өдөр тутамдаа цар тахал хяналтаас гарах вий, хорио цээрийн дэглэм хэрэгжихгүй байх вий, халдвар авчих вий, цаашдаа хэрхэн амьдрах талаар санаа зовниж, айдастай байх болсон билээ.

АНУ-д дөрөвдүгээр сарын сүүлчээр явуулсан санал асуулгаас харахад насанд хүрэгчдийн дийлэнх нь буюу 56 хувь нь цар тахлын улмаас сэтгэлийн түгшүүр, стресстэй байх болсон гэж хариулжээ.

Иймд ДЭМБ-аас цар тахлын үед сэтгэцийн эрүүл мэндээ хамгаалах арга, зөвлөмжийг танилцуулсан байна. Уг зөвлөмжид гаднаас хүлээн авч буй мэдээлэлдээ шүүлтүүртэй хандах, аль болох бусадтай амьд харилцаагаа хадгалах, олон нийтийн цахим сүлжээнд өнгөрүүлэх хугацаагаа багасгах, коронавирусийн талаарх албан бус мэдээллээс татгалзах, хэт их ядрахгүй байх зэрэг зөвлөмжүүд багтжээ.

Эх сурвалж: CBS