Ухань хотын 11 сая оршин суугчийг 10 хоногийн дотор коронавирусийн шинжилгээнд хамруулахаар болсон тухай тус улсын хэвлэлүүд мэдээлжээ. Эх сурвалжийн мэдээлснээр хотын бүх оршин суугчийг коронавирусийн нуклейн хүчлийн шинжилгээнд хамруулах юм байна. Энэхүү шийдвэрийг энэ сарын 9, 10-нд халдварын тохиолдол дахин идэвхжсэнтэй холбоотойгоор гаргажээ.

Тус хотод сар гаруйн дараа халдвар дахин идэвхжиж, зургаан шинэ тохиолдол илэрсэн юм. Сүүлд халдвар илэрсэн хүмүүс нь Дунсиху дүүргийн оршин суугчид бөгөөд тэдний хоёр нь гэрлэсэн хос аж. Цар тахлыг амжилттай давсан гэж байсан Хятад, Өмнөд Солонгос, мөн халдварын тархалт удааширч байсан Герман гэх зэрэг улсуудад сүүлийн өдрүүдэд халдвар дахин сэргэх байдал ажиглагдав.

Эх сурвалж: CNN