&#34Гудамж&#34 төслийн замыг хүлээн авах ёслолд үг хэллээ | News.MN - Мэдээллийн эх сурвалж

&#34Гудамж&#34 төслийн замыг хүлээн авах ёслолд үг хэллээ

Хуучирсан мэдээ: 2015.12.05-нд нийтлэгдсэн

&#34Гудамж&#34 төслийн замыг хүлээн авах ёслолд үг хэллээ

Увс аймагт хэрэгжсэн "Гудамж" төслийн замыг хүлээн авах ёслол дээр УИХ-ын дарга З.Энхболдын хэлсэн үг
 
 
 
Увсчууд та бүхний энэ өдрийн амар амгаланг айлтгая.
 
Монгол Улсын Засгийн газрын 2012-2016 оны мөрийн хөтөлбөрт аймаг бүрийг Улаанбаатар хоттой хатуу хучилттай авто замаар холбох, Улаанбаатар хот, аймгуудын төвийн авто замын нөхцлийг сайжруулах зорилт дэвшүүлсэн. Шинэчлэлийн Засгийн газар, 1.5 сая ам долларын “Чингис” бондыг босгож, УИХ-ын гишүүн, Эдийн засгийн хөгжлийн сайд Н.Батбаярын санаачилгаар 2013 оноос “Гудамж төсөл”-ийг Улаанбаатар хот болон  зураг төслөө бэлэн болгосон Архангай, Хэнтий, Увс аймгуудад  хэрэгжүүлж эхэлсэн. Өнгөрсөн хугацаанд Улаанбаатарт 24 уулзварыг шинэчилж 20 гаруй км замыг шинээр барьж Архангай, Увс аймагт хэрэгжүүлсэн “Гудамж” төсөл амжилттай хэрэгжиж дууслаа. Энэ замуудад 70 орчим сая ам долларын хөрөнгө оруулалт хийгдээд байна. Увс аймгийн Улаангом хотод гэхэд 10.5 км авто зам, 2.1 км  найман тойрог, 14.5 км явган зам, 2.1 км  дугуйн зам, 8.2 км гэрэлтүүлэг, гэрлэн дохио, инженерийн шугам сүлжээг хүчитгэсэн лотки, гүүр хоолой, ногоон байгууламж бүхий  авто замыг маш богино хугацаанд барьж, өнөөдөр ашиглалтанд хүлээн авч байна.
 
“Гудамж төсөл”-ийг хэрэгжүүлэхэд амар хялбар байгаагүй. Улсын нийслэлд ч, аймгийн төвүүдэд ч хот төлөвлөлтийн бодлого алдагдаж, замбараагүй газар олгосоны   уршгаар зам тавих газрыг чөлөөлөх ажил багагүй бэрхшээлтэй тулгарсан.  Батболд захиралтай “Гудамж төсөл”-ийн баг, аймаг, хотын удирдлага, иргэдийн хамтын ойлголцол, хүчин чармайлтын үр дүнд Улаанбаатар болон дээрхи гурван аймагт энэ төсөл амжилттай хэрэгжиж байгааг онцлон тэмдэглэж байна. 
 
Энэ ажлыг Увс аймагт сайн зохион байгуулсан аймгийн удирдлага, гүйцэтгэгч “Шинжан Шин фа” компани, хамтран ажилласан Увс аймгийн “Цахилгаан түгээх сүлжээ” ТӨК, “Цахилгаан холбоо”, “Ундарга Увс”, “Дэвшил Увс”, компани болон замын ажилд оролцсон нутгийн иргэд, төрийн бодлогыг дэмжиж газраа чөлөөлж өгсөн иргэн, аж ахуйн нэгж байгууллагууд, нийт Увсчууддаа талархал илэрхийлье.
 
“Гудамж" төслийн хүрээнд баригдсан замд иргэд, жолооч, үйлчлүүлэгчид талархалтай хандаж байна. Энэхүү бодлого цаг үеэ олсон зөв ажил байсан учраас  цаашид “Гудамж төсөл”-ийн ажлыг үргэлжүүлэх хэрэгтэй гэсэн саналыг бусад аймгууд УИХ, Засгийн газрын түвшинд удаа дараа тавьж байна. Тийм учраас бид “Гудамж төсөл”-ийн ажлыг цаашид үргэлжлүүлэхээр төлөвлөж байна.
 
Одоо “Гудамж" төслийн хүрээнд баригдсан замаа хамгаалах, байнга засаж тордох нь чухал гэдгийг анхаарч, энэ ажлыг орон нутгийн иргэд, төрийн болон төрийн бус байгууллагууд хамтын хүчээр шийдвэрлээд явна гэдэгт итгэж байна. Сүүлийн үед зарим нэг төрийн өндөр алба хашиж буй эрхмүүд төрөлх нутгийнхаа бүтээн байгуулалтыг үгүйсгэсэн, улс төрийн өчүүхэн хонжоо олох зорилготойгоор худал мэдээлэл цацаж, хэвлэл мэдээллийн хэрэгслээр Увс аймагт хэрэгжсэн “Гудамж төсөл”-ийг мөнгө угаасан, ямар ч үр дүнгүй, чанаргүй ажил болсон мэтээр ярьж, бичиж  байна. Худал үг хэдий хортой ч үнэнд гүйцэгдэнэ гэдэг. Бид өнөөдөр энэ төслийн хөрөнгөөр барьсан замыг  дэд бүтцийн хамт хүлээн авч байгаа нь бодит үр дүн. Манай Увсчууд бүтээлч сэтгэлгээтэй, хөдөлмөрч ард түмэн гэдгийг би мэднэ. Та бүхэн 2013-2015 оны хооронд 1000 өдөр уйгагүй хөдөлмөрлөж, ихийг бүтээн байгуулсан учраас Увс аймаг 2015 онд шилдэг аймгаар шалгарсан. Энэ бол та бүхний амжилт, нөр их хөдөлмөр, зүтгэлийн үр дүн учраас Увсчууддаа  баярлалаа. Цаашид энэ амжилтаа бататгаж, Монгол Улсын Их Хурал, Засгийн газартайгаа нэг баг болж, илүү эрч хүчтэй ажиллаж, төрөлх Увс нутгаа цэцэглүүлэн хөгжүүлэхийг Та бүхэндээ  уриалж байна.
 
ЭХ СУРВАЛЖ: http://open.parliament.mn
"Болор дуран"-аар шалгав.

0 сэтгэгдэл

News.mn сайтад сэтгэгдэл оруулахад анхаарах зүйлс

ИРГЭД 2015-12-05 103.229.122.239

АРД ТҮМНИЙГ ӨРӨНД УНАГАЖ, ЗАМ БИШ ТАМ БАРЬЖ ОЛОН ИРГЭНИЙГ ДИЙГ БУРХАНЫ ОРНД ЗАЛСАН ЮМ ХИЙЧИХЭЭД ЮУГ НЬ ГАЙХУУЛАХ ЮМ. ТЭНЭГҮҮД

1206 2015-12-05 103.229.121.206

Увсад 2 тэрбумын замын ажлын өртгийг 27 тэрбум болгож мөнгө угаасан хэрэг гарсан шүү дээ. Түүнийг нь шалгах ёстой. Учир нь аюулгүйн тойрог нь УБ хотод замын түгжрэлийн эх үүсвэр болоод байхад Увсад тийм зүйл нэрээр мөнгө угааж байна. Мөн тэр тойрог нь 3 машин ороод замын бөгрөл үүсгэдэг болсон нь үүний баталгаа шүү. УБ хотод замын түгжрэлийн асуудлыг шийдэхий оронд ямар ч түжрэлгүй аймгийн төвд Гудамж төсөл нэрээр АН мөнгө угаасан шүү дээ. Ямар ч ТЭЗҮ-гүйгээр ажил эхлүүлж хууль зөрчсөн, тендерч байхгүйгээр. Уг нь 2011 онд Увсад Хяргас нуурын хөвөөн хамгийн төвөгтэй 110 км замыг 39 тэрбум төгрөгөөр барьсан шүү дээ. Гэтэл аймгийн төвд 6-7 км замыг 27 тэрбумд хүргэсэн ГАВЪЯА ХЭНИЙХ ВЭ?

ИРГЭД 2015-12-05 103.229.122.239

ЯГ ИЙМ Л ЮМ ХИЙЖ МӨНГӨ УГААЖ БАЙГАА ШҮҮ. ЮУГАА АЙХУУЛАХ ГЭЭД БАЙНА ДАА