Цаг үеийн асуудлаар нийслэлийн Байгаль орчны газрын дарга Э.Баттулга, НОБГ-ын Гамшгийн шуурхай удирдлагын хэлтсийн дарга, дэд хурандаа Э.Эрдэнэбаатар, Агаарын бохирдолтой тэмцэх газрын Агаарын чанар, хяналт, зохион байгуулалтын хэлтсийн дарга Г.Даваажаргал, НЗДТГ-ын Хэвлэл мэдээлэлтэй харилцах хэлтсийн дарга Ц.Мөнхбаатар, НЭМГ-ын Нийгмийн эрүүл мэндийн хэлтсийн ахлах мэргэжилтэн Б.Баатарсүх нар өнөөдөр нийслэлийн Хэвлэл мэдээллийн төвд цахимаар мэдээлэл хүргэлээ.

НОБГ-ын Гамшгийн шуурхай удирдлагын хэлтсийн дарга, дэд хурандаа Э.Эрдэнэбаатар “Ковид-19 халдвараас урьдчилан сэргийлэх ажлын хүрээнд Улсын онцгой комисс болон нийслэлийн Онцгой комиссоос гаргасан шийдвэрийг хангуулан ажиллаж байна. НБОГ, НОБГ, НЦУГ, Тээврийн цагдаагийн алба хамтран хөдөлгөөнт эргүүлийг өдөр бүр 103 чиглэлд хяналт шалгалтыг зохион байгуулж байна. Энэ хугацаанд бид ногоон бүст аялал зугаалгаар явж байгаа 251 иргэн, 89 автомашины аюулгүй байдлыг хангуулан уулнаас буулгах арга хэмжээг авлаа. Дөрөвдүгээр сарын 10-наас 27-ны өдрүүдэд нийслэлийн ногоон бүст гарсан гал түймрийн нөхцөл байдлыг товч танилцуулья. Энэ хугацаанд ой хээрийн дөрвөн удаагийн түймэр, шар өвсний 122 дуудлагаар ажилласан байна. Иргэддээ анхааруулж хэлэхэд хаврын хуурайшилтын улиралд ой хээрийн түймрийн нэн аюултай энэ үед ногоон бүст аялал зугаалгаар явахгүй, ил гал түлэхгүй байх, зайлшгүй тохиолдолд асаасан галаа бүрэн унтраадаг байх арга хэмжээг авахыг хүсч байна” гэв.

Мөн Монгол Улсын Шадар сайдын тушаалын дагуу нийслэлийн нутаг дэвсгэрт “Ковид-19 халдварт цар тахлын үеийн харилцан ажиллагаа, хариу арга хэмжээ” дадлага сургуулилалтыг тавдугаар сарын 6-8-ны өдрүүдэд зохион байгуулахаар ажиллаж байна. Өглөөний 08:00 цагаас оройн 18:00 цаг хүртэл Чингэлтэй дүүргийн нутаг дэвсгэрт орох, гарах бүх хөдөлгөөнийг хориглоно. Энэ үед иргэд хөл хорионд орж өөрсдийнхөө аюулгүй байдлыг хангах үүргийг хүлээж оролцох ёстой. Иргэд тодорхой бэлтгэл бэлэн байдлаа хангаж, ажил үүргээ зохицуулан идэвхтэй оролцохыг уриалж байна гэдгийг Гамшгийн шуурхай удирдлагын хэлтсийн дарга, дэд хурандаа Э.Эрдэнэбаатар онцолж хэлсэн юм.

165 мянган ширхэг угаарын хий мэдрэгчийг айл өрхүүдэд суурилуулж дуусчээ

Нийслэлийн Агаарын бохирдолтой тэмцэх газрын Агаарын чанар, хяналт, зохион байгуулалтын хэлтсийн дарга Г.Даваажаргал “Угаарын хийнээс урьдчилан сэргийлэх ажлын хүрээнд зохион байгуулагдаж байгаа угаарын хий мэдрэгч төхөөрөмжийг нийслэлийн төвийн зургаан дүүргийн айл өрхүүдэд суурилуулах ажил бүрэн дуусаад байна. Нийтдээ 165 мянган ширхэг төхөөрөмжийг гэр хорооллын айл өрхүүдэд суурилуулж дууслаа” гэсэн мэдээллийг өглөө.

Нийслэлийн Байгаль орчны газрын дарга Э.Баттулга “Ойн тухай хуулинд гуравдугаар сарын 20-ноос зургаадугаар сарын 10-ыг хүртэл хаврын хуурайшилтын үе байдаг. Гал түймрийн шалтгаан нөхцөлийг авч үзвэл өнжмөл өвс шатаах, ил задгай гал түлэх, гагнуур хийх, цахилгааны утсанд богино холбоо үүсгэх гэсэн шалтгаануудын улмаас ой хээрийн түймэр гарах нөхцөл бүрддэг. Тийм учраас иргэддээ энэ цаг хугацаанд эдгээр үйлдлүүдийг хийхгүй байхыг анхааруулж хэлмээр байна” гэв.

НЗДТГ-ын Хэвлэл мэдээлэлтэй харилцах хэлтсийн дарга Ц.Мөнхбаатар “Жилийн турш үргэлжлэх “Хотын соёл” аяны хүрээнд олон ажлууд хийгдээд явж байна. Ирэх долоо хоногт коронавирусийн цар тахлаас хамгаалах дадлага сургуулилалтыг Чингэлтэй дүүрэг болон бусад хэд хэдэн байршилд зохион байгуулна. Энд хэвлэл мэдээллийн байгууллагууд идэвхтэй оролцож, иргэдэд зөв мэдээллийг хүргэж ажиллахыг хүсч байна. Мөн хотын соёлтой холбоотой болон бусад цаг үеийн мэдээ мэдээллийг иргэдэд шуурхай хүргэж ажилладаг хэвлэл мэдээллийн байгууллагууддаа энэ дашрамд талархсанаа илэрхийлье” хэмээлээ.

Нийслэлийн ЗДТГ-ын Хэвлэл мэдээлэлтэй харилцах хэлтэс