PepsiCo компани Украинд төрсөн Оросын дуучин, телевизийн хөтлөгч Регина Тодоренкотой хийсэн зар сурталчилгааны гэрээгээ цуцаллаа. Тэрбээр гэр бүлийн хүчирхийллийн талаарх байр сууриа олон нийтэд илэрхийлсэн нь ийнхүү тус компани гэрээгээ цуцлах шалтгаан болсон байна.

Регина Тодоренко гэр бүлийн хүчирхийллийн дуулианд холбогдоод байсан бөгөөд People Talk сэтгүүлд өгсөн ярилцлагадаа "Хэрвээ эмэгтэй хүн гэр бүлийн хүчирхийллийн хохирогч болсон бол өөрсдөө л хариуцлагаа үүрэх хэрэгтэй" хэмээн хэлсэн нь олон нийтийн дургүйцлийг төрүүлсэн. Ярилцлага олон нийтэд ил болсны дараа Регина уучлал гуйжээ.

PepsiCo компанийн Орос дахь салбарын Хэвлэл, олон нийттэй харилцах захирал Александр Костиков “Регинагийн хэлсэн үг биднийг "шок"-нд орууллаа, олон хүний сэтгэлийг гонсойлголоо. Түүний энэ байр суурь манай компанийн баримталдаг зарчим, үнэт зүйлстэй зөрчилдөж байна. Бид аливаа хэлбэрийн хүчирхийллийн эсрэг байдаг. Тиймээс түүнтэй хамтран ажиллах зар сурталчилгааны гэрээгээ цуцалж байна” хэмээн хэлсэн юм.

Glamour сэтгүүл мөн Регинагийн ярилцлагын дараа түүнд олгосон “Оны эмэгтэй” номинацаа цуцалж байгаагаа мэдэгдсэн.