Коронавирусийн халдварын нөхцөл байдал цаашид хүндэрвэл ард иргэдийг эдийн засгийн хувьд дэмжих зорилгоор нөөц хөрөнгө гаргахад Засгийн газар бэлэн байна хэмээн ОХУ-ын Сангийн сайд Антон Силуанов мэдэгдлээ.

"Бидэнд хангалттай нөөц бий. Хөл хорионы дэглэм цаашид хэчнээн үргэлжилсэн ч шаардлагатай гэвэл ард иргэдээ эдийн засаг, санхүүгийн хувьд дэмжинэ” хэмээн Антон Силуанов телевизийн "Россия 24" сувагт өгсөн ярилцлагадаа хэлсэн байна.

Коронавирусийн нөхцөл байдал нь төсөвт хүндээр тусч байгааг сайд хэлжээ. “Батлагдсан төсвийн хүрээнд ДНБ-ий 2,8 хувийг хөл хорионы онцгой нөхцөл байдалд зохицуулан гаргаж байна” хэмээн Антон Силуанов хэллээ. Ингэхдээ Үндэсний баялгийн сангаас хоёр их наядыг гаргаж байгаа ажээ. 2020 оны төсөвт тусгагдсан зардлуудаа танахгүй гэдгийг тэр мөн хэлсэн байна.