АНУ-ын Охайо мужийн Лисбон хотын иргэн 55 настай Деб Сиггинс гэх эмэгтэй хэдэн зуун амны хаалт оёж хүмүүст тараажээ. Ингэхдээ тэр хөл хорион дэглэм зөрчиж гадуур явж тараагаагүй. Тэрбээр гэрийнхээ үүдэн дэх модны мөчирт өөрийн оёсон амны хаалтуудаа яг л шинэ жилийн гацуурын чимэглэл шиг өлгөжээ.

“Би амны хаалтуудаа зарахгүй ээ. Бусадтай хуваалцах нь надад аз жаргал авчирдаг” хэмээн Деб Сиггинс ярьжээ.

Эхлээд тэр 100 ширхэг амны хаалт оёж эмнэлэгт хандивлахаар төлөвлөж байсан ч хөршүүд, найз нөхөд нь түүнээс амны хаалт оёж өгөхийг хүссэн байна. Ингээд түүнд сайн үйлс хийх санаа төрж, илүү олон хүнд өөрийн урласан амны хаалтаа бэлэглэхийг хүсчээ. Модонд өлгөсөн амны хаалтууд өдөртөө л дуусдаг ба тэрбээр цаашид гал сөнөөгч, дэлгүүрийн худалдагчид, өндөр настнуудад амны хаалт оёж хандивлах бодолтой байгаагаа илэрхийлжээ. Түүнчлэн цар тахал дуустал сайн санааны үйлсээ үргэлжлүүлсээр байх болно гэжээ.

Эх сурвалж: CNN