Ерөнхийлөгч Улсын онцгой комисст тусгай зориулалтын хувцас хандивлалаа | News.MN

Ерөнхийлөгч Улсын онцгой комисст тусгай зориулалтын хувцас хандивлалаа

Ерөнхийлөгч Улсын онцгой комисст тусгай зориулалтын хувцас хандивлалаа

Монгол Улсын Ерөнхийлөгч Х.Баттулга үндэсний үйлдвэрлэгч “Exclusive” компанийн үйлдвэрлэж буй “exMed” брэндийн 5,000 ширхэг вируснаас хамгаалах тусгай зориулалтын хувцсыг худалдан авч, Улсын Онцгой комисст хандивлалаа.

Хандивын хамгаалах хувцсыг Монгол Улсын Ерөнхийлөгчийн Тамгын газрын дарга Ө.Шижир Улсын Онцгой комиссын дарга Ө.Энхтүвшинд өнөөдөр гардууллаа.

ЭНЭ ҮЕЭРЭЭ МОНГОЛ УЛСЫН ЕРӨНХИЙЛӨГЧИЙН ТАМГЫН ГАЗРЫН ДАРГА Ө.ШИЖИР:

“Монгол Улсын Ерөнхийлөгч Х.Баттулга цар тахлын халдварыг тогтоон барих, тархалтаас сэргийлэх, голомтод ажиллаж буй эмч, мэргэжилтнүүд, албан хаагчдад зайлшгүй хэрэгтэй 5,000 ширхэг хамгаалах хувцсыг хувиасаа хандивлаж байгааг дуулгахад таатай байна. Энэхүү хандив Улсын Онцгой комисс, Эрүүл мэндийн яам болон бусад байгууллагуудын үйл ажиллагаанд нэмэр болно гэж итгэж байна.

Эдгээр хамгаалах хувцсыг дотоодын үйлдвэрлэгч “Exclusive” компани олон улсын стандартад нийцүүлэн үйлдвэрлэж байна. Тус компани өдөрт 1,200 ширхэг хувцсыг үйлдвэрлэх хүчин чадалтай. Цаашдаа олон улсын зах зээлд гаргах зорилготой бөгөөд тус компанийн бүтээгдэхүүнийг Польш улсын компаниас худалдаж авах санал ирүүлсэн тухай надад танилцуулсан. Нэг талаасаа өнөөгийн эдийн засгийн хямралтай үед баяртай мэдээ гэж ойлгож байгаа.

Монголчууд бид өөрсдийн нөөц бололцоогоо ашиглан аюулгүйн хувцас үйлдвэрлэх боломж байна гэдгийг харуулж, хичээж ажиллаж байгаа тус компанийханд талархал илэрхийлж байна.

Монгол Улсын Ерөнхийлөгчийн зүгээс энэ нөхцөлд ажиллаж байгаа эмч, эмнэлгийн ажилчид, Улсын Онцгой комиссын нийт албан хаагчид энэ бүхний ард гарч, даван туулна гэдэгт бүрэн итгэлтэй байгаа” гэлээ.

Улсын Онцгой комиссын дарга, Шадар сайд Ө.Энхтүвшин Монгол Улсын Ерөнхийлөгчийн зүгээс өндөр эрсдэлтэй нөхцөл байдалд ажиллаж байгаа төрийн албан хаагчид, эмнэлэг, онцгой байдал, мэргэжлийн хяналтын мэргэжилтнүүдэд маш их хэрэгтэй байгаа хамгаалах хувцсыг хандивласанд талархаж байгаагаа илэрхийллээ.

Монгол Улсын Ерөнхийлөгчийн Тамгын газрын дарга Ө.Шижир Улсын Онцгой комиссын удирдлага дор цар тахлын голомтод ажиллаж буй нийт албан хаагчид, эмч, сувилагчид, мэргэжилтнүүдэд ажлын амжилт хүслээ.

Цар тахлын хэмжээнд хүрээд буй коронавируст халдвараар (COVID-2019) өнөөдрийн байдлаар дэлхий даяар 2.5 сая гаруй хүн өвчилж, Монгол Улсад 35 тохиолдол бүртгэгдсэн. Гаднаас зөөвөрлөгдөн орж ирсэн дээрх тохиолдлуудыг Халдварт өвчин судлалын үндэсний төвд /ХӨСҮТ/ эмчилж, 8 хүн эдгэрсэн билээ.

Манай улсад 4 дүгээр сарын 22-ны байдлаар тусгаарлан ажиглах байранд 1,222 иргэн байгаа бөгөөд эдгээр байруудад 201 эмч, эмнэлгийн мэргэжилтэн, үйлчилгээний ажилтан иргэдтэйгээ хамт тусгаарлагдан ажиллаж байна. Түүнчлэн Гамшгаас хамгаалах өндөржүүлсэн бэлэн байдлын зэрэгт шилжүүлсэнтэй холбогдуулан орон даяар 2,000 гаруй албан хаагч, эмч, сувилагч, мэргэжилтэн Улсын Онцгой комиссын Шуурхай штабын удирдлага дор ажиллаж байна.

Монгол Улсын Засгийн газрын 2020 оны 30 дугаар тогтоолын дагуу эмнэлгийн тусламж үйлчилгээнд хэрэглэх эм, эмнэлгийн хэрэгсэл, эрүүл мэндийн ажилчдыг хамгаалах хувийн хамгаалах хэрэгсэл, оношлуур, ариутгал халдваргүйжүүлэлтийн бодисыг Засгийн газрын нөөц хөрөнгөөр худалдан аваад байгаа юм.

Худалдан авсан хувийн хамгаалах хэрэгслийн нөөцийн 50 хувийг Халдварт өвчин судлалын үндэсний төвд олгож, үүнээс тусгаарлах байр, тандалт судалгаа, лаборатори, халдварын голомтод ажиллаж байгаа эмнэлгийн ажилчдыг хангаж байна. Үлдсэн 50 хувиас 20 хувийг аюулгүйн нөөцөд авч, 30 хувийг эрүүл мэндийн байгууллагуудад олгосон байна. Одоогоор Халдварт өвчин судлалын үндэсний төвд олгосон нөөцийн 25 орчим хувийг зарцуулаад байна.

ЭХ СУРВАЛЖ: PRESIDENT.MN

Энэ мэдээнд өгөх таны сэтгэгдэл?
10
ЗөвЗөв
2
ТэнэглэлТэнэглэл
1
ХахаХаха
1
ХөөрхөнХөөрхөн
0
ГайхмаарГайхмаар
0
ХарамсалтайХарамсалтай
0
БурууБуруу
Баярлалаа!

10 сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2020-04-22 202.55.188.41

Ерөнхийлөгч Баттулга их энгийн хүн нь улам мэдэгдэх юм, маш их баярлалаа ,Ерөнхийлөгчөө

Avatar

Зочин 2020-04-22 207.6.112.23

Salute!!!!

Avatar

Зочин 2020-04-22 192.82.78.249

Бусдын зовлон шаналангаар ашиг хийх нь ёс бус зүйл. Гэхдээ нэгэнт найдвартай хамгаалах хувцасны эрэлт хэрэгцээ ихэссэн энэ үед, корона дэлгэрээгүй улсын бараа бүтээгдэхүүн өндөр үнэлэгдэх нь тодорхой. Тиймээс аж ахуйн нэгжүүдийн үйл ажиллагааг эко цэвэр хүнс, эм эмнэлгийн бараа бүтээгдэхүүний үйлдвэрлэл рүү хандуулж, урамшуулж, дэмжин туслах, энэ талбар дээр ажлын байрыг олшруулах шаардлагатай.

Avatar

Зочин 2020-04-22 107.150.95.20

Ард түмнээс хулгайлсан 3 их наяд төгрөгөөс буцааж шүлс дусаажээ Жэнко.

Avatar

зочин 2020-04-22 192.82.70.188

Ёрөнхийлэгч цагаа олсон сайхан санаачлага гаргажээ Монголчууд үүнийг дэмжиж энэ чухал ажилд дэмжлэг туслалцаа өөрийн бололцоогоор үзүүлэх б**х аа Харин манай сэтгэгдэл бичигч зарим хүмүүс юу нь хөдөлчдөг юм Ийм санаачлага гаргасан хүнийг учиргүй дайрч доромжлоод эсвэл атаархаж тавлаад сайхан сэтгэл рүү ус хийгээд хорлоод хаячих юм Хөрөнгөтний зах зээлийн нийгэмд биё биёнээ хайрлах туслах ёсгүй Амиа бодсон чоно шиг байх ёстой гэсэн үзэл толгойд нь яс суусан байдаг шиг байна аа

Avatar

Зочин 2020-04-22 66.181.161.114

Манай ЖЕНКО бол энэ байтугай хандив өгөхөөр баян хүн шүү дээ!!! КОВИД-19 эмчлэх шинэ эмнэлэг хандивласан ч чадна л даа!!!

Avatar

Зочин 2020-04-22 107.150.95.20

Аргагүй ш дээ. Монгол Улсын өнгөтэй өөдтэй болгоныг иргэн бүрт тараах ёстой Эрдэнэс Тавантолгойн 2018 оны ногдол ашигтай нь хулгайлсан Жэнко доо.

Avatar

Иргэн 2020-04-22 202.179.8.4

Ерөнхийлөгч Эрдэнэс Тавантолгойн үйл ажиллагаанд оролцох ямар ч хууль зүйн боломж байхгүй. Учраа мэдэж хуцаж бай л даа

Avatar

ЗОЧИН 2020-04-22 202.21.126.30

ЕТГ-ЫН ДАРГА ЧИНЬ ХӨЛ БӨМБӨГЧИН ХӨӨРХӨН БАЦААН БАЙНА ШДЭЭ.

Avatar

Зочин 2020-04-22 169.253.162.4

Erunkhiillugchdoo bayarlalaa. Mundag shuu. Undesnii uildverleelee demjeed bas nuhtsul baidlaa oilgoj handiv urgusun ni mash saikhan medee bna daa. Uhaantai huu umdaa.

NewsMN Гар утасны хувилбар Татах
NEWS.mn

Мэдээллийн эх сурвалж