Сургууль, цэцэрлэгийн танхимын сургалтыг есдүгээр сарын 1 хүртэл зогсоох шийдвэр гаргасан тухай БСШУС-ын сайд Ё.Баатарбилэг энэ долоо хоногт мэдээлсэн билээ.

УГ ШИЙДВЭРТЭЙ ХОЛБОГДУУЛАН

• Танхимын хичээл, сургалт зогссон ч теле хичээл зургадугаар сарын 1 хүртэл үргэлжилнэ,
• Сурагчдыг хоёрдугаар улирлын дүнгээр тооцож анги дэвшүүлнэ,
• Хүүхэд улираах, дахин сургах асуудал гарахгүй,
• Төгсөх ангийн сурагчдын ЭЕШ-ыг долдугаар сарын 2-нд явуулна,
• Их, дээд сургуулийн элсэлтийг долдугаар сарын 8,9-нд зохион байгуулна,
• Энэ жил элсэгчдээс монгол хэл, бичгийн шалгалтыг авахгүй,
• Цэцэрлэг болон хувийн сургуулийн хаврын бүртгэлийг наймдугаар сарын хоёрдугаар хагаст зохион байгуулна,
• Энэ жил есдүгээр анги төгсөж байгаа сурагчдын дунд улаан шугам татахгүй, МСҮТ-д элсэх, эсвэл үргэлжлүүлэн ЕБС-даа суралцах эсэхээ сурагч өөрөө шийдэх аж.

Мөн энэ сарын 13-ны байдлаар, 28500 сурагч 12 дугаар анги төгсөх мэдээ байна. Үүнээс одоогоор 20 мянга гаруй сурагч ЭЕШ-даа бүртгүүлжээ. ЭЕШ-ын бүртгэл, зохион байгуулалтыг цахимаар шийдэж байгаа аж. БСШУСЯ-наас төлбөртэй хувийн сургууль, цэцэрлэг төлбөрөө хөнгөлөх асуудлыг эцэг эхчүүдтэй нь зөвшилцөж, байгуулсан гэрээнийхээ хүрээнд шийдэх нь зүйтэй гэж үзжээ.

Э.АРИУН