Лондон хот дахь Эквадорын Элчин сайдын яаманд орогнож байхдаа Жулиан Ассанж нууцаар хоёр хүүхэдтэй болжээ. “Wikileaks” сайтыг үндэслэгч Жулиан Ассанж 2015 оноос хойш Стелла Моррис гэгч эмэгтэйтэй харилцаатай байж, хоёр хүүтэй болсон аж. Жулиан Ассанж 2011 онд Өмнөд Африк гаралтай, хуульч мэргэжилтэй Стелла Морристой танилцсан аж. Тухайн үед Стелла Моррис түүний хуулийн багт ажиллаж байжээ. Тэд 2015 оноос болзож эхэлсэн ба хоёр жилийн дараа сүй тавьсан аж. Улмаар өдгөө гурван настай Габриэл, нэг настай Макс нарыг төрүүлжээ. Энэ тухай Стелла Моррис олон нийтэд мэдэгдэж, Жулиан Ассанжад санаа зовж буйгаа илэрхийлжээ.

Жулиан Ассанжийг өнгөрсөн жил Элчин сайдын яамнаас хүчээр гаргаж, Английн зүүн өмнөд хэсэг дэх Белмарш шоронд хорьсон юм. Жулиан Ассанж шоронд коронавирусийн халдвар дэгдэхээс сэрэмжилж, батлан даалтад суллагдахаар хөөцөлдөж эхэлжээ. Австралийн иргэн, 48 настай Жулиан Ассанж АНУ-ын Үндэсний аюулгүй байдлын газар, Тагнуулын агентлагийн олон тооны нууц мэдээлэл, материалыг нийтэд дэлгэснээр асуудалд оржээ. Түүнийг АНУ-д шилжүүлэн өгвөл цаазын ял хүлээж буй хэмээн Жулиан Ассанж айж буй. Мөн тэрбээр Шведэд бэлгийн хүчирхийлэл үйлдсэн хэрэгт буруутгагджээ. Жулиан Ассанж 2012 онд Лондон дахь Эквадор улсын Элчин сайдын яаманд орогнох эрх авснаар Швед улсад шилжүүлэгдэхээс сэргийлжээ.

Их Британи болон Уэльсэд коронавирусийн халдвараас сэргийлэн хөнгөн ялтай 4000 орчим хоригдлыг суллажээ.

Эх сурвалж: ВВС