Хойд Америкийн үндэсний сагсан бөмбөгийн холбоо буюу NBA-ийн зүгээс лиг нь зогссон эдгээр өдрүүдэд тоглогчдынхоо дунд NBA 2k20 видео тоглоомын аварга шалгаруулах тэмцээн зохион байгуулж, нийт 16 тамирчин өрсөлдөж аваргаа тодруулжээ.

Энэ удаагийн NBA 2k20 тэмцээний аваргаар Финикс Санс багийн од тоглогч Девин Бүүкер тодорч 100 мянган ам.долларын эзэн болж "Сovid-19" өвчний эсрэг санд хандивлаж байгаа аж.

Девин Бүүкер энэхүү тэмцээнд Денвер Наггетс багийн Майкл Портер Жр, Вашингтон Визардс багийн Руй Хачимура, Лос Анжелес Клипперс багийн Монтрезл Харрел болон Финикс Санс багийн анд Деандре Эйтон нарыг ялж аварга болжээ.

Мөн NBA-ийн багуудын зүгээс холбоондоо лиг үргэлжлэхээс нэг сарын өмнө багуудад цуглах боломж олгож, бэлтгэл хийх хугацаа өгөхийг хүсчээ.