ОХУ-аас нутаг буцах хүсэлтэй 282 монгол иргэнийг Алтанбулаг боомтоор өчигдөр (2020.04.11) улсын хилээр нэвтрүүлэх, тусгаарлах ажиллагааг УОК-оос зохион байгуулав. Тэдний дийлэнх нь ОХУ-д суралцдаг оюутнууд юм.

ОХУ-ын Буриад улсын Засгийн газар манай иргэдийг Эрхүү хотоос Алтанбулаг-Хиагт боомтод дөрвөн автобусаар хүргэжээ. Дээрх иргэдийн 100 гаруй нь Москва, 90 орчим нь Эрхүү, 60 орчим нь Улаан-Үдэд суралцдаг оюутан юм байна.

Монгол Улсын онцгой комисс ХӨСҮТ-өөс оношлуурын баг явуулж, хилийн боомтод ажиллуулсан. Мөн хилийн 0101 дүгээр анги, цагдаа, онцгой, мэргэжлийн хяналтын байгууллагын алба хаагчид ажиллажээ. Тэдгээр иргэдийн 100 гаруйг нь Дархан-Уул аймагт, үлдсэн иргэдийг Улаанбаатар хотод 21 хоног тусгаарлана. Улаанбаатар хотод тусгаарлах иргэдийг өчигдөр 22.00 цагт тээвэрлэн хүргэсэн байна.

Дашрамд дурдахад, өнөөдрийн 21.00 цагийн байдлаар ОХУ-д шинэ төрлийн коронавирусээр 13584 хүн өвчилж, 106 хүн амиа алдаж, 1045 хүн эдгэрчээ.

Б.ЖАРГАЛ