Дэлхийн 213 оронд тархсан цар тахлын голомт Ухань хотод удаан хугацааны хөл хорио, карантин энэ долоо хоногт эцэслэж, оршин суугчид өдөр тутмын амьдралдаа эргэн орсон билээ. Тэгвэл өчигдөр /2020.04.10/ Ухань хотын хамгийн том их дэлгүүрийн гадна түрээслэгчид нь жагсаал хийжээ. “Grand Ocean” их дэлгүүрийг түрээсийн төлбөрөө буулгахыг шаардан худалдаа эрхлэгчид жагссан аж. Жагсагчид халдварт өвчнөөс сэргийлэх зөвлөмжийн дагуу амны хаалт зүүж, хоорондоо нэг метрийн зайтай сөхрөн сууцгаажээ. Жагсаалыг цагдаа нар ажиглаж, хамгаалалтад гарсан байв.

Өмнөх өдөр нь Хятадын олон нийтийн сүлжээний “Weibo” сайтад худалдаа эрхлэгчид “түрээсийн төлбөрөөс нэг жил чөлөөлөх эсвэл өнгөрсөн хугацааны түрээсийн мөнгийг буцаан олгох”-ыг шаардсан видео бичлэг байршуулсан аж. Гэвч тус бичлэгийг олонд хүрэхээс нь өмнө устгажээ.

Ухань хот өнгөрсөн нэгдүгээр сарын 23-аас хойш хөл хорио, карантинд байсны эцэст өнгөрсөн Лхагва гаригт цуцлагджээ.

Эх сурвалж: Bloomberg