Сонгинохайрхан дүүргийн иргэдийн төлөөлөл өнөөдөр /2020.04.10/ цаг үеийн асуудлаар мэдээлэл хийлээ. Тэд тус  дүүргийн нутаг дэвсгэрт гарал үүсэл нь үл мэдэгдэх бүтээгдэхүүн, сонин сэтгүүл тараагдаж байгаа мэдээллийг дэлгэсэн юм.  Ингэхдээ энэ үйлдлээ өдрийн цагаар ч гэлтгүй шөнийн оройн цагаар хаалга нүдэх, гарын үсэг зуруулах, гараас гарт дамжих ариутгалын бодис тараах байдлаар  явуулж байгаад бухимдалтай байгаагаа илэрхийлсэн. Сонгуулийг цагт нь хийх боломжтой атал хорио цээрийн дэглэмийг сахин явуулах ёстой энэ үед эдгээр зүйлсийг тарааж байгаа нь улс төрийн намууд сонгуулийн ажлаа эхлүүлсэн гэж үзэхээс өөр аргагүй байдал үүссэн аж. Иймд  сонгуулийг хийж эхлүүлэх ёстой хуулийн хугацаанд нь хийхийг хүслээ.  СХД-ийн 4-р хорооны иргэн Л. Дашцэнгэл “Дүүргийн бүх айл өрхөд жавелин, 9 ширхэг бээлий, сонин зэргийн хүргэх өртгийг хэн санхүүжүүлж байна вэ гэдгийг Сонгуулийн Ерөнхий Хороо, мөн АТГ-г шалгаж өгөхийг хүсч байна” гэв.  Мөн энэ үеэр аль ч улс төрийн намууд дахин ийм төрлийн суртчилгаа явуулбал баримттай дэлгэн олон нийтэд хүргэхээ ч онцлов.

СХД-ийн 3-р хорооны иргэн Ш.Отгоо хэлэхдээ “Улаан загалмай байгууллагын нэрээр “Тесо” компаний бүтээгдэхүүнүүдийг  шөнийн цагаар гарын үсэг зуруулж тараагдаж байна. Мөн жавелины уусмалыг “Ардчилал таймс” сонинтой хамт тараасан. Иймд улс төрийн намуудад хандаж хэлэхэд иргэд энэ мэт хууль бус зүйлд автахгүй. Энэ увайгүй үйлдлээ зогсоох хэрэгтэй гэдгийг хатуу сануулж байна ” гэв.

Ц. ЯНЖИНДУЛАМ