Монгол Улсын Гавьяат жүжигчин, поп хатагтай Б.Сарантуяа 16 жилийн дараа өөрийн үнэнч фентэйгээ уулзжээ. Тэрбээр 2003 онд Ховд аймгийн Дарви суманд “Би жаргалтай” аялан тоглолтоор явж байхдаа зам дагуу таарсан гурван жаалыг гэрт нь дөхүүлж, дурсгалын зураг татуулсан байна. Гэтэл түүний нэг жилийн өмнө хийсэн “Амьдрал” аялан тоглолтын үеэр гурван жаалыг нэг нь анх уулзаж байсан түүхээ ярьж, дахин дурсгалын зураг авахуулжээ.

Поп хатагтай Б.Сарантуяа энэ тухайгаа  “Би 2003 онд Ховд аймгийн Дарви суманд “Би жаргалтай” аялан тоглолтоор явж байхдаа таарсан юм. Тухайн үед орой болж байсан шиг санагдаж байна. Зам дагуу хичээлээ тараад явж байгаа гурван хүүтэй таарч, гэрт нь дөхүүлж өгсөн. Тэгээд би “За хэний машинд суусан хүүхдүүд вэ” гэсэн чинь нөгөө гурав маань андуураад л “Ариунаа эгч, Сараа эгч” гээд намайг танихгүй байсан. Тэр үед би саравчтай малгай өмсчихсөн, нүүрээ будаагүй шахуу л явсан. Тэгээд “Та нар дуучин Б.Сарантуяагийн аялан тоглолтын машинд суусан байна шүү” гэж хэлээд уран бүтээлийнхээ плакат өгч, хамт дурсгалын зургаа авахуулсан түүхтэй. Миний хувьд тэр бяцхан хүүхдүүдийн зүрхэнд мартагдаагүй, баярын оч үлдээсэн учраас 16 жилийн дараа санан санан байж тоглолтыг маань зорьж ирсэн нь маш сайхан санагдсан.

Сүүлд 2019 оны дөрөвдүгээр сард “Амьдрал” аялан тоглолтоор Ховд аймгийн Зэрэг суманд очиход нөгөө гурван жаалын маань нэг нь надтай анх уулзсан тухайгаа ярьсан. “Тухайн үедээ харуй бүрийд хүүхдүүдийг дулаахан машиндаа суулгаж, гэрт нь дөхүүлж, дуучин эгчтэй дурсгалын зургаа татуулсан нь сэтгэл зүрхэнд тод дурсамж болж үлдсэн” гэдгийг хэлж байсан. Би тэр зургаа сайн санадаг юм. Учир нь тэр зураг миний гэрэл зургийн үзэсгэлэнд орж байсан. Нээрээ л тэр зургийн дахин харсан хар эрээн хувцастай жаал ханагар том залуу болсон байна лээ. Надад маш сайхан санагдсан. Үнэнч фенүүд маань бүр хүүхэд наснаасаа миний дууг сонсч, тоглолтыг маань зорин ирж байгаа нь маш сайхан байлаа” гэсэн юм.

А.СҮРЭН