Ираны дипломатчид коронавирустэй тэмцэх хичээл зүтгэлд нь саад болж буй АНУ-ын хориг арга хэмжээг потошоп ашиглан дахин шүүмжилжээ.

Ираны Гадаад хэргийн яамны твиттертээ тавьсан зурагт "Дайны гэмт хэргийг дэмжихээ боль", "АНУ-ын ёс суртахуунгүй, хууль бус хоригийг бүү тахин шүт" хэмээн өмнө нь дипломатч Жавад Зарифын хэлсэн үгийг иш татжээ.

Мөн зургийн голд "ХОРИГ" хэмээн том үсгээр бичсэний "О" үсгийг коронавирус хэлбэртэй болгож, ард нь АНУ-ын Төрийн нарийн бичгийн дарга Майк Помпеогийн зургийг бүдэгхэн эвлүүлсэн байна. Мөн ерөнхий дэвсгэрт оруулсан жижигхэн коронавирусийн дүрсүүд АНУ-ын хориг тавьсан мужуудыг, эсвэл Иранд халдвар тархсан хэмжээг илэрхийлж байх шиг харагдана.

Иран одоогоор цар тахалд хамгийн ихээр нэрвэгдсэн орнуудын нэгээр нэрлэгдэж, 41495 хүн халдвар авснаас 2757 нь нас барсан байна. Өдгөө Ираны эдийн засаг бүхлээрээ сүйрч байгаа бөгөөд АНУ-ын тавьсан хоригийн уршгаар Тегеран эм болон хэрэгцээт бараа худалдан авахад их бэрхшээлтэй байгаа аж.

Ираны мэргэжилтнүүд үүсээд байгаа хүнд нөхцөл байдлын тухай НҮБ зэрэг олон улсын байгууллагуудад хандаж, цар тахлын энэ аймшигт үед бүх улсад тавьсан хоригийг яаралтай түдгэлзүүлэхийг шаардсан ч адилхан Covid-19 өвчинд ихээр нэрвэгдсэн АНУ шаардлагыг үл хүлээн зөвшөөрчээ.

Энэ сарын эхээр Помпео Ираны удирдагчдыг чадваргүй учир улсдаа вирусийн тархалтыг барьж чадаагүй, тэр бүү хэл вирус тархахад тусаллаа хэмээн зэмлэж байсан билээ.

Эх сурвалж: RT