Шинэ төрлийн коронавирусийн халдварын тохиолдол дэлхийн 198 оронд бүртгэгдэж, 400 мянга давсан тухай Дэлхийн эрүүл мэндийн байгууллага мэдээлж байна. Тус байгууллагын анхааруулж буйгаар, covid-19 халдвар маш эрчимтэй тархаж байгаа ажээ. Тодруулбал, хоёрхон хоногийн өмнө covid-19 –ийн халдварын тохиолдол 300 мянгад хүрч байсан бол өнөөдөр /2020.03.26/ 08.50 цагийн байдлаар коронавирусийн халдварын тохиолдол 468644 болж өсчээ. Харин халдвар авч, эмнэлгийн тусламж үйлчилгээ авч, эдгэсэн хүмүүсийн тоо 114218 болсон бол коронавирусийн улмаас нас барсан иргэдийн 21191 –д хүрлээ.

ДЭМБ-ийн мэдээлж буйгаар, БНХАУ-д  нийт covid-19 тохиолдол 81285 бүртгэгдсэн бол Италид 74386 , АНУ-д 65797, Испанид 49515, Германд 37323 тохиолдол бүртгэгдсэн бол 24 цагийн байдлаар буюу өнгөрсөн шөнө БНХАУ-д 67,  Италид  5210, АНУ-д 10 941, Испанид 7457, Германд 4332, Иранд 2206, Францад 2929 тохиолдол шинээр бүртгэгджээ.

Коронавирусийн халдвар Европт эрчимтэй тархаж буйтай холбоотойгоор Их-7 бүлгийн улс орнууд 71 тэрбум фунт стерлингийн санхүүгийн тусламжийг ДЭМБ-д үзүүлэхээр болжээ.