Дэлхийн спортын одод шинэ коронавирусийн эсрэг хандив өгсөөр байна. Энэ удаад дэлхийн хөлбөмбөгийн ноён оргилууд болох Кристиано Роналдо, Лионель Месси болон алдарт дасгалжуулагч Пеп Гвардиоло нар тус бүр 1 сая еврог хандивлаж буйгаа зарлалаа.

Кристиано Роналдо

Тэрбээр өөрийн агент Хорхе Мендестэй хамтран шинэ коронавирусийн эсрэг тэмцэж буй эмнэлгийн гурван анги нэгтгэлд 1 сая евро хандивлалаа. Эхний ээлжинд тус мөнгөөр Лиссабон хотын Санта Мариа эмнэлгийн эрчимт эмчилгээний тасагт болон Порто хотын Сан Антонио эмнэлгийн эрчимт эмчилгээний тасгуудад нэн шаардлагатай, хэрэгцээтэй тоног төхөөрөмжийг нь худалдан авч өгөх аж.

Пеп Гвардиоло

Английн Манчестер Сити багийн ахлах дасгалжуулагч Пеп Гвардиоло covid-19 өвчинтэй тэмцэж буй төрөлх Испани улсдаа 1 сая евро хандивласан. Тэрбээр одоогийн байдлаар Испанийн Барселона хот дахь өөрийн гэртээ байгаа бөгөөд ойрын хугацаанд өөрийн хуулчидтайгаа зөвлөлдөн энэхүү мөнгийг хэрхэн зарцуулахаа шийдэх гэнэ.

Лионель Месси

Хөлбөмбөгийн түүхэн дэх шилдэг тоглогчдын нэг Лионель Месси covid-19 өвчний эсрэг эмчилгээнд болон вакцины судалгаанд зориулан нийт 1 сая еврог Барселона хотын улсын эмнэлэгт хандивласан байна. Энэхүү мэдээг тус эмнэлгийн твиттер хаяг олон нийтэд зарлажээ.