Шинэ коронавирусийн халдвараар өнөө өглөөний байдлаар дэлхийн 188 орны 307613 хүн өвчилж, 13050 хүн нас барсан бол 95797 хүн эдгэрчээ. Халдвараар өвчилсөн хүний тоогоор авч үзвэл Хятад 81054, Итали 53578, АНУ 26687, Испани 25496, Герман 22364, Иран 20610 , Франц 14459, Өмнөд Солонгос 8897 тэргүүлж байна.

Харин халдвараар нас барсан хүний тоогоор авч үзвэл Италид өчигдөр 793 хүн нас барснаар нийт 4825, Хятадад зургаагаар нэмэгдэж 3261, Иранд 123-р нэмэгдэж 1556, Испанид 285-р нэмэгдэж 1378, Францад 112-р нэмэгдэж 562, АНУ-д 84-р нэмэгдэж 340, Их Британид 56-р нэмэгдэж 233, Нидерландад 30-р нэмэгдэж 136, Өмнөд Солнгост 10-р нэмэгдэж 104 болжээ.

Хятадын Ухань хотод өнгөрсөн хоёрдугаар сард гарсан уушигны үрэвсэл үүсгэгч коронавирусийн халдвар буюу covid-19 өвчнийг цар тахлын хэмжээнд хүрснийг өнгөрсөн долоо хоногт ДЭМБ зарласан.
Хятад улсад халдварын тоо өдрөөс өдөрт буурч байгаа ч Европ тивд өвчлөл эрчимтэй нэмэгдсээр байна. Ялангуяа Итали улсад халдвараар өвчлөгсдийн тоо их байгаагаас эмч эмнэлгийн ажилчид хүрэлцэхгүй, хавдар, эрхтэн шилжүүлэх мэс заслаа хойшлуулан ажиллаж байгаа ч хоногт хэдэн зуугаараа хүмүүс нас барж байна. Италийн засгийн газраас хөл хориог хатуу сахиулахын тулд цэргүүдийг дайчилж эхэлжээ. Түүнчлэн тус улсад Куба болон Хятад улсаас эмч нарын баг очин ажиллаж байна.