Улсын онцгой комиссын шийдвэрээр өчигдөр /2020.03.21 / ОХУ-ын Тува улсын Кызыл хотод суралцдаг Монголын 53 оюутныг татан авах ажиллагааг Боршоогийн шалган нэвтрүүлэх боомтод мэргэжлийн албан хаагчдын хяналт, шалгалтын дор зохион байгууллаа. Тэдгээр оюутнууд Кызыл хотноо эмчийн хяналтанд байсан бөгөөд Улаангомд ирэхэд нь тусгаарлах байранд шилжүүлээд байна. Оюутнуудыг 14 хоногийн хугацаанд тусгаарлан УОК, ЭМЯ-наас өгсөн заавар, зөвлөмжийн дагуу хяналтад байлгах юм.

Мөн энэ сарын 19, 20-нд Кызыл хотоос улсын хилээр нэвтэрсэн дөрвөн иргэнийг тусгаарлах байранд ажиглалтад авчээ. Тэд Ирланд-Москва чиглэлийн онгоцоор Москвад бууж Боршоогийн хилээр нэвтрэн орж ирсэн тул Увс аймгийн Нэгдсэн эмнэлгийн Халдвартын тасагт тусгаарлан, шинжилгээ авч ХӨСҮТ-ийн вирус судлалын төв лабораторид илгээгээд байна. Өчигдрийн байдлаар Улаангомд Монгол улсын 58 иргэн тусгаарлалтанд байгаа юм.  Дээрх иргэдийн биеийн байдал хэвийн байгаа талаар Увс аймгийн Онцгой комиссоос мэдээллээ.