НЭМЭЛТ:

Улсын онцгой комиссын хуралдаанаар өндөржүүлсэн бэлэн байдлыг дөрөвдүгээр сарын 30-ныг хүртэл сунгалаа. Ингэснээр их, дээд сургууль, ЕБС, цэцэрлэгийн үйл ажиллагаа эхлэх хугацаа ч мөн хойшилж, дөрөвдүгээр сарын 30-ныг хүртэл сунгагдаж байгаа юм.

Бүх шатны боловсролын байгууллагын үйл ажиллагаа дөрөвдүгээр сарын 30-ны Пүрэв гаригаас эхэлж, улмаар тавдугаар сарын 1,2 гээд Бямба гаригуудад хичээллэнэ. Тодруулбал,

• ЕБС-ийн бага анги дөрөвдүгээр сарын 30-аас зургадугаар сарын 6 хүртэл Бямба гаригуудад хичээллэнэ.
• Дунд, ахлах анги дөрөвдүгээр сарын 30-аас зургадугаар сарын 13 хүртэл Бямба гаригуудад хичээллэнэ.
• Цэцэрлэгийн үйл ажиллагааг тавдугаар сарын 31 хүртэл орно.

Элсэлтийн ерөнхий шалгалтыг сонгуулийн дараа буюу долдугаар сарын 2-5-ны өдрүүдэд зохион байгуулна. Харин их, дээд сургуулийн элсэлтийг долдугаар сарын 7-8 өдрүүдэд зохион байгуулна. Их дээд сургуулиуд зургадугаар сарын 15 хүртэл үргэлжилж, наймдугаар сарын 15-ны Даваа гаригт хичээлийн шинэ жил эхэлнэ. 

ЕБС-ийн багш нарын ээлжийн амралтад өөрчлөлт орохгүй, зургадугаар сарын 15-аас эхэлж, наймдугаар сарын 24-нд ажил нь эхэлнэ хэмээн БСШУС-ийн сайд Ё.Баатарбилэг мэдэгдлээ.

Мөн олон улсын нислэг, галт тэрэгний хөдөлгөөнийг түр зогсоосон хугацааг дөрөвдүгээр сарын 30 хүртэл сунгалаа. Ингэхдээ олон улсын ачаа, дамжин өнгөрөх тээвэр хэвийн үргэлжилнэ. Гэхдээ тусгай хамгаалалт дор явагдана гэдгийг Зам, тээврийн хөгжлийн сайд Б.Энх-Амгалан хэллээ.

УОК-ын дарга, Шадар сайд Ө.Энхтүвшин: Италиас 300 орчим иргэн эх орондоо яаралтай ирэх хүсэлт гаргасан. Зөвхөн Итали гэхгүйгээр Европын орнуудаас энэ асуудлыг тавьж байна. Эхний чартер нислэгээр ирсэн иргэдийн тусгаарлалтын 14 хоног дууссаны дараа дараагийн чартер нислэгийг хийнэ. Чухам аль улс руу чартер нислэг хийж, иргэдээ авчрах эсэх асуудлыг Зам, тээврийн хөгжлийн яам судалж байна.

Улсын онцгой комиссын гаргасан шийдвэрийг Засгийн газрын хуралдаанаар эцэслэн шийднэ.

УОК-ын дарга Ө.Энхтүвшин: Нөхцөл байдал маш түргэн өөрчлөгдөж байна. Гадаадын улс орнуудад байгаа 200 мянга гаруй монгол иргэд ямархуу нөхцөлд байна вэ гэдэг асуудалд онцгой анхаарах шаардлага тулгарсан. Гаднын орнуудын их, дээд сургуулиуд нь бүгд хаагдсан. Яаралтай сургуулийн дотуур байрыг суллаж өг гэдэг шаардлагыг оюутнуудад тавьж байгаа. ОХУ, АНУ зэрэг Европын орнуудад ямар ч үйлчилгээ байхгүй болж байна. Гаднын иргэдэд байтугай өөрсдийн иргэддээ үйлчлэх боломжгүй нөхцөлд хүрсэн. Тийм учраас монгол оюутнууддаа  онцгой анхаарах ёстой. Энд байгаа 3 сая иргэн маань гол нь шүү дээ гэж ярьж болохгүй болчихлоо. Ингэж ч бодож болохгүй. Гадаадад байгаа иргэддээ ямар нэгэн арга хэмжээ авч дор хаяж тэдэнд байнга зөвлөгөө өгөх шаардлагатай болж байна. Иргэдийнхээ хүссэн газар руу нь чартер нисгээд аваад ирнэ гэвэл худлаа хэлсэн болно. Агаарын харилцааны гэрээтэй  орнууд гэж бий. Тэдгээр орнуудтайгаа ярина уу гэхээс биш гэрээ хэлэлцээргүй орнууд руу шууд Монголын МИАТ-ын онгоц нисгээд авчирна гэж яривал худлаа. 14 хоногт багтаан чартер явуулна гэвэл бас л худлаа. Өмнөх орнууд руу явсан нисэх багийнхан бүгд 14 хоногийн тусгаарлалтад орсон. Эхний удаад тусгаарласан иргэдийнхээ биеийн байдлыг мухарлах хэрэгтэй байна. Түүнээс биш дээр дээрээс нь авчраад тусгаарлаад байх боломжгүй.

-Төлбөртэй сургуулиудын төлбөрийн асуудлыг хэрхэн зохицуулах вэ?

БСШУС-ын сайд Ё.Баатарбилэг:   Хувийн гэлтгүй төрийн өмчит сургуулиудад ч хүндрэл үүсээд байна. цэцэрлэг, сургуульд хүүхдүүд нь яваагүй гэдгээр төлбөрөө өгөөгүй  зэрэг асуудлууд их байна. Төлбөр өгөөгүй бол багш нарын цалин байхгүй. Багш нар цахимаар хичээлээ заагаад ажиллаагүй биш цахимаар ажилласаар байгаа юм. Их, дээд сургуулиудад мөн л хүндрэл гарч байна. Хичээлийн жилийн хоёрдугаар хагас оюутнууд хичээллэсэнгүй. Хичээлийн жилийн хоёрдугаар хагасын жилийн төлбөрийг сургуулиуд  хуримтлуулаагүй байна. Тиймээс багш нартаа оюутнуудын хичээлийн хоцрогдлыг нь арилга, цахимаар хичээлийг нь хийлгэ гэдэг чиглэлийг өгч байгаа. Багш нар оюутнуудтайгаа харьцаж ажиллаж л байна. Бид сургалтын чанарын сайн, мууг дараа нь ярина. Өнөөдрийн байдлаар цахим сургалтад оюутнуудын сэтгэл ханамж  70-80 хувьтай байна гэсэн судалгаа гарсан. Нэгэнт их, дээд сургуулиудын багш нар ажлаа хийж байгаа учраас цалин авах ёстой. Гэтэл нөгөө талдаа оюутнуудынхаа төлбөрөөр багш нарынхаа цалинг тавьж байгаа дээд сургуулиудын данс улайж байна. Энэ бүхнийг цогцоор нь харж аль аль талынх нь оновчтой гаргалгааг хийхээр тооцоо судалгаа хийгээд ажиллаж байна. Энэ талаарх тодорхой саналыг удахгүй  Засгийн газрын хуралд оруулахаар төлөвлөсөн.

-Чартер нислэгээс илэрсэн Монгол иргэдийг тухайн улсдаа  хаана, хэнтэй уулзсан гэдэг маршрутыг гаргахгүй бол тухайн оронд хамт байсан хүмүүс нь айдастай байна. Энэ тал дээр яаж ажиллаж байна вэ?

 –ГХЯ тухайн орнуудынхаа Элчин сайдын яам, консулын газартай байнга холбогдож, ийм ийм монгол иргэн коронавирустэй гэдэг нь тогтоогдлоо. Тэдэнтэй ойрын хавьталд байсан хүмүүст нь анхааруулж, зайлшгүй шинжлүүлэх зэрэг ажлуудыг хийж байгаа.

Намрын ээлжит чуулган дөрөвдүгээр сарын 5-нд буюу хугацаандаа эхлэх үү. УИХ-аар хүлээгдэж байгаа олон хууль бий?

–Чуулган эхлэх ёстой. Гэхдээ өнөөдөр тэгэх ёстой, тэгнэ гэж хэлж чадахгүй болчхоод байна. Энэ нөхцөл байдал ер нь цаашдаа яаж эргэх, яаж өрнөх вэ гэдгийг харах хэрэгтэй байна. Одоогийн байдлаар манайд коронавирусийн халдвар авсан нийтдээ зургаан хүн байна. Ингээд мухарласан гэж хэлж болохгүй. 14 хоногийн далд үе нь болоогүй байна. Мөн Стамбулаас ирсэн хүмүүсийг тусгаарлах, шинжлэх ажил ид явж байна. Тиймээс цаашид халдвар авсан хүмүүсийн тоо нэмэгдэх үү, үүнийгээ сайн харж байж дараа дараагийн шийдвэрүүдээ баталгаатай хэлэхгүй бол яг одоо чуулган дөрөвдүгээр сарын 5-нд эхлээд, тийм тийм асуудал хэлэлцээд явна гэж хэлэхэд өнөөдөр арай л эрт байна. Гэхдээ хуулийн хугацаатай ажлуудаа хугацаанд нь хийхийн төлөө бэлтгэлээ хангаад ажиллана.

-Гадаад байгаа иргэдийн виз сунгалтын асуудлыг хэрхэн зохицуулж байна вэ?

–ГХЯ визний асуудлыг шийдвэрлэж байгаа.

УЛСЫН ОНЦГОЙ КОМИСС ХУРАЛДАЖ БАЙНА

Улсын Онцгой комиссын хуралдаан дөнгөж сая эхэллээ. Хуралдаанаар их, дээд, ЕБС, цэцэрлэгийн үйл ажиллагааг дөрөвдүгээр сарын 30 хүртэл сунгах эсэх талаар шийдвэр гаргана. Мөн гадаадад буй иргэдийнхээ талаар, цаг үеийн бусад арга хэмжээнүүдийг ярилцана.

УОК: ЦЭЦЭРЛЭГ, СУРГУУЛИЙН ХОРИОГ СУНГАХ ЭСЭХИЙГ ШИЙДНЭ

Улсын онцгой комисс өнөөдөр/2020.03.20/ 14.00 цагаас хуралдана. Хуралдаанаар коронавирусийн талаарх цаг үеийн нөхцөл байдлын мэдээллийг сонсоно. Мөн сургууль, цэцэрлэгийн хориог сунгах эсэх асуудлыг шийдвэрлэх юм.

Эрүүл мэндийн яамны зүгээс гуравдугаар сарын 30-ныг хүртэл тогтоосон сургууль, цэцэрлэгийн карантиныг дөрөвдүгээр сарын 30-ны өдөр хүртэл сунгах нь зүйтэй гэсэн саналаа БСШУСЯ-нд хүргүүлсэн.

Гадаад улс орнууд хорио цээрээ чангалж, манай улсад коронавирус зөөвөрлөгдөн орж ирсэн үед хорио цээрийн дэглэмийг үргэлжлүүлж халдвар тархахаас урьдчилан сэргийлнэ гэж ЭМЯ-наас үзэж байгаа аж. Тиймээс талуудын ирүүлсэн санал дээр үндэслэн сургууль, цэцэрлэгийн карантиныг сунгах эсэхийг Улсын онцгой комисс өнөөдөр эцэслэн шийдвэрлэнэ.