Улсын онцгой комиссын хуралдааны талаарх мэдээллийг яг одоо хүргэж байна.  Улсын онцгой комиссын 12-р хуралдаанаар Баян-Өлгий аймагтай цахимаар холбогдож Казакстан улсаас ирсэн буй иргэдийн талаар ямар арга хэмжээ авч байгаа талаар ярилцлаа. Баян-Өлгий аймагт 133 иргэнийг, 59 иргэнийг гэрт нь  тусгаарлан, тандалт хийж байна. Хурлын эхэнд Улсын онцгой комиссын дарга мэдээлэл өглөө.

УЛСЫН ОНЦГОЙ КОМИССЫН ДАРГА Ө.ЭНХТҮВШИН:

-Одоогоор 750 орчим иргэдийг хүлээн авч, тусгаарлан үзлэг хийгдэж байна. Одоо бид эдгээр иргэдээ хяналтад авч, ойр ойрхон шинжилгээ авч, дахин нягталж, халдвар авсан иргэдээ яаралтай эдгээхээр ажиллаж байгаа бөгөөд эдгээхийн төлөө бид ажиллаж байна. Бид ер нь бол бэлтгэлээ хангасан, хяналтад байгаа. Хамгийн гол нь иргэд албан ёсны мэдээллээ авч, тайван, хариуцлагатай байх ёстой шүү. Сүүлийн үед коронавирусийн халдвараар буруу ташаа мэдээлэл түгээж, улс төрийн ашиг хонжоо харж байгаа тохиолдол гарч байгаа учраас цаашид ийм зүйл гаргахгүй байхыг хүсч байна.

ЭРҮҮЛ МЭНДИЙН САЙД Д.САРАНГЭРЭЛ:

-Өнөөдрийн байдлаар нийтдээ 1330 иргэнийг тусгаарлан, ажиглалтад аваад байна. Үүнээс 257 хүн ХӨСҮТ-д тусгаарлагдсан бөгөөд Франц иргэний биеийн байдал хэвийн, эмчилгээ хийгдэж байна. 257 хүнээс 88 нь Франц улсын иргэнтэй ойрын хавьтал бөгөөд шинжилгээний хариу сөрөг гарсан. Гэхдээ тусгаарлах ажиллагаа үргэлжилж байгаа. Мөн Монголын гурван иргэн коронавирусийн халдвар авсан нь тогтоогдсон учраас энэ хүмүүстэй хамгийн ойр зорчиж ирсэн 111 хүнийг ХӨСҮТ-д авчирч, 61 хүний шинжилгээний хариу сөрөг гарсан. ДЭМБ коронавирусийн халдварын эмнэлзүйн зааврыг улс орнуудад өгч байгаа, үүний дагуу манай эмч, мэргэжилтнүүд ажиллаж байна. Монголын гурван иргэнийг эмчилгээг ч шуурхай эхлүүлээд байна. Хувь хүний нууцтай холбоотой асуудлыг зарлаад байх нь зохимжгүй, БНСУ-аас ирсэн хоёр хүний биеийн байдал тогтвортой, Берлинээс ирсэн иргэний биеийн байдал хүндэвтэр байгаа.

Ийнхүү мэдээллийн дараа сэтгүүлчдийн асуултад хариулт өглөө.

-БНСУ-аас ирсэн онгоцонд МХЕГ-ын байцаагч, студийн зураглаач нар байсан гэх иргэдийг тусгаарлаагүй гэх мэдээлэл байна?

-БНСУ-ын талаас Мэргэжлийн хяналтын байцаагч болон Херо энтертаймантын зураглаач нарыг иргэдтэй хамт тусгаарласан байгаа. Тусгаарлаагүй гэдэг ташаа мэдээлэл.

-Шинэ нөхцөл байдалтай холбоотойгоор хорио, цээрийг сунгах эсэх асуудлыг Улсын онцгой комисс хэлэлцсэн үү?

-Гуравдугаар сарын 30 хүртэл хорио цээрийн дэглэм тогтоож, сургууль, цэцэрлэгийн хориг цаашид сунгах эсэх талаарх асуудлыг БСШУС-ын яамнаас Улсын онцгой комисст оруулж ирэх ёстой. Одоогоор оруулж ирээгүй байна.

-Цаашид аймаг, орон нутгийн замыг хаах уу?

-Мөн аймгуудаас гарах, орох хөдөлгөөнийг нээсэн байгаа. Ганц Баян-Өлгий аймгийн орох, гарах хөдөлгөөнийг хаасан байгаа. Одоогоор орон нутгийн хөдөлгөөнийг хорихгүй. Агаарын нислэгүүд гуравдугаар сарын 28-н хүртэл хаасан бөгөөд дараагийн хурал хүртэл энэ асуудлыг хойшлуулсан байгаа. Энэ удаагийн үйл явдлаас харж байхад гадаадад байгаа иргэд халдвар авсан, тээгч болсон байж болзошгүй гэдэг дүгнэлт хийж болохоор байна. Тиймээс бид тэдгээр иргэд рүүгээ чиглэн ажиллах, бусад арга хэмжээ авах шаардлага гарч байна.

-БНСУ-д байгаа Монголын иргэд хорио цээрийг дэглэм сахихгүй ажил хийж байна, шинжилгээг хэрхэн авах талаар мэдээлэл өгөөч?

-БНСУ өөрийн дотоод онцгой нөхцөд байдлаараа ажиллаж байгаа. Тэдний дотоод зохион байгуулалтын үед гадаад, дотоодын иргэд гэлтгүй нэг л дэглэм үйлчилж байгаа. Тухайн улсын хууль дүрмээр явж байгаа. Хэрэв үүнтэй холбоотойгоор тодорхой эзэнтэй мэдээлэл байвал бид Солонгосын талтай ярилцлана. Солонгост 160-280 мянган вон төлж байж шинжилгээ хийлгэж байгаа бөгөөд тухай иргэн өөрөө төлбөрөө төлж буй. Бид сая иргэдээ авахдаа шинжилгээнд хамруулаад авах хүсэлт тавьсан боловч шинж тэмдэг илрээгүй бол шинжилгээ хийхгүй гэдгийг хэлсэн. Энэ нь дэлхийн бүх улсад ийм зарчим үйлчилж байгаа.

-Авчирч байгаа иргэд эрсдэлтэй ихэнх нь өвчтэй болон бусад шалтгаантай хүмүүс байна. Цаашид ийм эрсдэлтэй хүн орж ирвэл ямар арга хэмжээ авах вэ?

-Өндөр настан, өвчтэй олон төрлийн хүмүүс байгаа учраас бид тэднийг авах арга хэмжээгээ авна.

-Нэг хүнээ ч гэсэн авах ёстой байтал яагаад эндээс зураглаач авч яваад нэг суудал бөглөсөн юм бэ?

-БНСУ-д байгаа иргэд ямар мэдээлэлтэй байна, цаана үлдсэн хүмүүс юу захиж хэлүүлэх нь вэ гэх мэт сэрэмжлүүлэх, сургамж авах үүднээс бичлэг хийж үлдээх ёстой гэдэг үүднээс нэг зураглаач явуулсан. Ийм нөхцөл байдал нэг удаа өнгөрөх бус цаашид ийм эрсдэл учирвал бид яах вэ гэдэг үүднээс баримтжуулж, сургамж авах үүднээс зураглаач явуулсан.

-Нэгэнт коронавирусийн халдвар илэрсэн ийм үед цаашид эрүүл мэндийн салбар, Улсын онцгой комсс ямар арга хэмжээ авч ажиллах вэ?

-Коронавирусийн цар тахалын үед эмнэлэг, онцгой байдлын ерөнхий газар, бусад байгууллага ямар арга хэмжээ авч ажиллах вэ гэдэг иж бүрэн төлөвлөгөөг өнөөдөр өглөө Улсын онцгой комиссын дарга баталсан. Өнөөдрөөс энэхүү төлөвлөгөө, стандартыг аймаг орон нутаг, салбаруудад хүргэж, түүний дагуу ажиллахаар бэлтгэлээ хангаж байна.

-Нүүрс тээвэр хэзээ эхлэх вэ. Цагаан хадан дээр маш олон жолооч нар цугларсан боловч нүүрс тээвэр эхлээгүй, Улсын онцгой комиссын шийдвэр хүлээж байна гэсэн мэдээлэл байна?

-Энэ сарын 15-н хүртэл бэлтгэл ажлаа хангасан бол нүүрс тээвэр эхлүүлэх ёстой байсан. Гэвч бэлтгэл ажил дутуу хийгдсэн, БНХАУ-ын талтай сайн ярьж, тохиролцох шаардлага байгаа учраас одоогоор нүүрс тээвэрлэлтийг эхлүүлэхийг хойшлуулах шаардлага үүсч байна. Мөн жолооч нар бэлтгэл хангасан эсэх талаар нягталж, бэлтгэл ажлыг шуурхайлахыг анхааруулаад байгаа.

Эрүүл мэндийн байгууллага гурван сарын турш хориглон, хамгаалах чиглэлээр хангалттай ажилласан. Шинэ коронавирусийн халдвар гаднаас зөөвөрлөгдөж орж ирсэн учраас халдвар авсан хүмүүсээ ямар эм тариагаар, ямар тоног төхөөрөмж хэрэглэх вэ гэдэг чиглэлээр арга хэмжээ авсан. Эхний ээлжинд ХӨСҮТ болон бүх эрүүл мэндийн салбарынхан цаг мөч бүрт шуурхай, 24 цагаар ажиллаж байгаа учраас иргэд маань хүлээцтэй, хариуцлагатай байхыг албаныхан санууллаа.

УЛСЫН ОНЦГОЙ КОМИСС ХУРАЛДАЖ БАЙНА

Улсын онцгой комисс өнөөдөр /2020.03.17/ цаг үеийн асуудлаар хуралдаж байна. Монгол Улсад шинэ коронавирусийн халдварын дөрвөн тохиолдол бүртгэгдсэнтэй холбоотойгоор хэрэгжүүлэх зарим арга хэмжээ, Баян-Өлгий аймагт үүссэн нөхцөл байдал, нүүрс тээвэрлэхтэй холбоотой болон бусад цаг үеийн асуудлыг хэлэлцэх юм байна.

Сануулахад, Монгол Улсад коронавирусийн анхны тохиолдол гуравдугаар сарын 10-ны өдөр Франц улсын иргэнээс илэрсэн бол гуравдугаар сарын 16-ны өдөр БНСУ-аас ирсэн Монгол Улсын хоёр иргэн, Франц улсаас дамжин ирсэн нэг иргэнээс коронавирусийн халдвар илэрч, дөрвөн тохиолдол бүртгэгдээд байна.