Улсын онцгой комиссын шуурхай штабаас  өнөөдөр /2020.03.15/ хот хоорондын зорчигч тээвэр болон хувийн тээврийн хэрэгсэл, орон нутгийн хуваарьт нислэг, суудлын галт тэрэгний хөдөлгөөний хязгаарлалтыг сунгахгүйгээр маргааш /2020.03.16/ өглөөний 07:00 цагаас хөдөлгөөний хязгаарлалт дуусна хэмээн мэдэгдсэн.

Тэгвэл  энэ сарын 11-16-ныг хүртэл Улаанбаатар хотод нийтдээ 4825  аж ахуйн нэгж байгууллагын үндсэн үйл ажиллагааг түр зогсоогоод байсан хотын даргын захирамжийн үйлчлэл маргааш дуусах юм. Өөрөөр хэлбэл, захирамжид дурдагдсан үйлчилгээний байгууллагууд маргаашнаас эхэлж үйл ажиллагаа нь хэвийн явагдана гэсэн үг.

Түр зогсоосон байгууллагуудаас дурдвал хүнсний худалдаанаас бусад томоохон их дэлгүүрүүд, үсчин гоо сайхан, гутал захиалга засвар, хими цэвэрлэгээ, гэр ахуйн мод модон хэрэглэл, алт мөнгө үнэт эдлэлийн дэлгүүр  гэрэл зураг угаах үйлчилгээнүүд, барьцаалан зээлдэх газар, автомашины худалдаа, бүх төрлийн авто  засварын газар, түргэн үйлчилгээний цэгүүд  хамаарч байсан юм.

ДАРААХ ҮЙЛЧИЛГЭЭНИЙ БАЙГУУЛЛАГУУД МАРГААШААС ХЭВИЙН АЖИЛЛАНА

• Хүнсний худалдаа, бүх төрлийн худалдаа, үйлчилгээний газрууд,  бүх төрлийн барааны дэлгүүр
• Бүх төрлийн хүргэлтийн хоолны үйлчилгээ
• Халуун усны үйлчилгээ, ахуйн үйлчилгээний цэг салбарууд /үсчин, гоёлын гоо засал, хувцас засвар, гутал захиалга, засвар, хими цэвэрлэгээ, гэр ахуйн модон эдлэл захиалга, засвар, ахуйн электрон, цахилгаан хэрэгсэл засвар, цоож, цаг, нүдний шил засварлах, түлхүүр олшруулах, цүнх захиалга, засвар, алт, мөнгө, үнэт эдлэлийн захиалга, засвар, худалдаа, гэрэл зураг авах, угаах үйлчилгээ, айл нүүлгэх үйлчилгээ/
• Дугуй засварын үйлчилгээ, бүх төрлийн авто засвар, үйлчилгээ, худалдааны газрууд автомашины худалдаа, авто сэлбэгийн худалдаа, бүх төрлийн авто засвар, бусад үйлчилгээ
• Смарт карт цэнэглэгч, борлуулагч цэг бусад төрлийн түргэн үйлчилгээний цэгүүд

Э.БУРАМ