НЭМЭЛТ: 

Увс аймагт өнөөдрөөс эхлэн гуравдугаар сарын 16-ны өдрийн 07.00 цаг хүртэл аймаг, сумын төвөөс гарах, орох хөдөлгөөнийг түр хязгаарлажээ.

Англи улсын иргэн нь Улаангом хотод нэг хоноод, Бөхмөрөн сумын Ямаат гэдэг газар дөрөв хоног байгалийн зураг авчээ. Ингэхдээ нутгийн малчны хажуугийн гэрт байрлаж байсан аж. Тиймээс аймгийн Онцгой комисс бүхэлд нь хөл хорио тогтоохоор болсныг албаныхан мэдээллээ.

Аймгийн Онцгой комиссоос Англи улсын иргэнтэй нэг онгоцонд орон нутгийн нислэгээр ирсэн хүмүүс болон байрласан зочид буудал, хоол идсэн ресторан, үйлчлүүлсэн хоёр дэлгүүрт түр хугацаагаар хөл хорио тогтоож, ариутгал хийж байна.

НЭМЭЛТ: 

Увс аймагт Английн иргэнийг тусгаарлажээ. Тодруулбал, COVID-19 -ын халдвар авсан нь батлагдсан Франц улсын иргэнтэй нэг онгоцонд зэрэгцэн сууж ирсэн Англи улсын иргэн “Аэро монголиа” авиа компанийн онгоцоор Увс аймагт гуравдугаар сарын 5-нд ирсэн гэдгийг тус аймгийн Засаг даргын Тамгын газраас мэдээлжээ. Английн иргэнийг нэгдүгээр хавьтал гэж үзэн, одоогоор Бөхмөрөн сумын Хотгорын уурхайн ойролцоо тусгаарлаад байгаа ажээ. Тэрбээр 67 настай, эрэгтэй юм байна. Аймгийн онцгой комиссоос шаардлагатай арга хэмжээг авч ажиллаж байгаа тул иргэдийг хөдөлгөөнөө хязгаарлаж, гараа тогтмол угааж, маскаа зүүхийг анхааруулж байна. Иргэнээс авсан шинжилгээг өнөөдөр Улаанбаатар хот руу явуулна.

Дээрх иргэн Улаангомд “Ундармал улаан сарнай” ресторанд хоол идэж, “Хишигт 1, 2” дэлгүүрээр үйлчлүүлсэн гэнэ. Одоогоор Увс аймгийн онцгой комисс хуралдаж байна. Уг хуралдааны шийдвэрийг удахгүй мэдээлнэ.

Монгол Улсад коронавирусийн анхны тохиолдол өчигдөр /2020.03.09/ шөнө Дорноговь аймагт бүртгэгдсэн юм. Тодруулбал, 2020 оны гуравдугаар сарын 2-ны өдөр Москва- Улаанбаатар чиглэлийн онгоцоор Монголд ирсэн Франц улсын иргэнээс урьдчилсан шинжилгээгээр “COVID-19” илрээд байгаа. Дэлхийн хэмжээнд эл өвчний халдвар 115 оронд бүртгэгдээд байна.

А.СҮРЭН