Москва-Улаанбаатар чиглэлийн “Аэрофлот” компанийн онгоцоор гуравдугаар сарын 02-нд Монгол Улсад ирсэн Франц улсын иргэнээс шинэ коронавирусийн халдвар илэрсэн. Тус улсын иргэн Монголд ирээд Ариг, КФС, Веренда хоолны газруудаар үйлчлүүлсэн нь тодорхой болсон. Тэгвэл “Ариг” рамен рестораны зүгээс албан ёсны мэдэгдэл гаргажээ.

Мэдэгдэлд "Франц улсын иргэн Ариг Аня рестораны Bluesky хажуу салбарт гуравдугаар сарын 5-ны өдөр хоёр гадаад иргэний хамт үйлчлүүлсэн байна. Эрсдэлээс сэргийлэх үүднээс Bluesky хажуу салбарын үйл ажиллагааг зогсоож, ажилчдыг чөлөөлж тусгаарлалт хийгдсэн. Манай ресторанууд эрүүл ахуйн мэргэжлийн, олон улсын стандарт хангасан FHC байгууллагын байнгын хяналтад ажилладаг. Халдваргүйтэл, ариутгал тогтмол хийж байсан. Цагдаагийн байгууллага хурдтай ажиллаж байгаад талархая. Тухайн салбарын ажиллагсдаас ямар нэгэн сэжигтэй шинж тэмдэг илрээгүй байна" гэжээ.

Мөн ЗӨСҮТ-ийн шуурхай хариу арга хэмжээний баг тус иргэний зорчсон газруудыг судлан тогтоож, голомтын халдваргүйжүүлэлтийн ажлыг гүйцэтгэж байна.

Э.АРИУН

Гэрэл зургийг Н.БАТМӨНХ