Сэлэнгэ аймгийн Засаг дарга бөгөөд аймгийн Онцгой комиссын дарга Ш.Оргил өнөөдрийн /2020.03.07/   нөхцөл байдлын талаар мэдээлэл хийв.

Өдрийн 12:00 цагийн байдлаар Алтанбулаг боомтоор 238 тээврийн хэрэгслээр 490 Монгол, 62 гадаад нийт 552 зорчигч хил нэвтэрчээ. Зорчигчдын биеийн халууныг хэмжин, эрүүл мэндийн асуумж авахад сэжигтэй тохиолдол илрээгүй байна. Мөн тус боомтоор 243 тээврийн хэрэгслээр  Монгол 454 , гадаадын 70 иргэн   нийт 524 зорчигч гарсан байна.

Алтанбулаг-Улаанбаатар чиглэлийн авто замын Шаамар сумын Дулаанхааны дөрвөн зам, Баянгол, Сайхан сумдын хяналтын цэгээр  өнөө өглөөний 08:00 цагийн байдлаар гарах чиглэлд 158 тээврийн хэрэгсэл, 514 зорчигч, орох чиглэлд 84 тээврийн хэрэгсэл 278 зорчигч нэвтэрч, нийт 346 зорчигчдод асуумжийн хуудас олгож, бүртгэл хөтлөн нэвтрүүлжээ.

Түүнчлэн Сүхбаатар боомтоор 306 дугаар галт тэрэг 30 зорчигчтойгоор өчигдөр 22 цаг 30 минутад Сүхбаатар өртөөн дээр орж ирсэн байна. Үүнээс Монгол 12, гадаад улсын 18 иргэн байсан бөгөөд зорчигчдын халууныг хэмжин, эрүүл мэндийн асуумж авахад өвчлөл бүртгэгдсэн Япон улсаас дамжин орж ирсэн Монгол Улсын нэг иргэн байсан тул ажиглалтад түр тусгаарлахаар Дархан-Уул аймгийн Онцгой комисст хүлээлгэн өгчээ.

Б.ЦЭЦЭГ