Монголын сүмо бөхийн холбооны ерөнхийлөгч Кёкүшүюзан Д.Батбаярын өмгөөлөгч Ж.Оюунболд өнөөдөр /2020.03.06/мэдээлэл хийлээ.

Тэрбээр хэлэхдээ"2020 оны хоёрдугаар сарын 22-нд олон нийтийн хэвлэл мэдээллийн хэрэгслээр Анхаар: АН-ын гишүүд хятадуудтай нийлж, лицензийн наймаа хийлээ гэсэн бичлэг цацагдсан. Түүнээс улбаатай, төрийн долоон албан хаагчтай холбоотой 65 минутын бичлэг, 19 минутын нэвтрүүлэг гарсан. Энэ бичлэгийг Цэдэв овогтой Алтанзаг гэж хүн хийсэн. Энэ хүн нь 1990-д оны үед залилан мэхлэх гэмт хэрэг үйлдсэний улмаас 15 жилийн хорих ял эдэлж байсан, 2000 оны эхээр ялаа эдэлж дуусаад шоронгоос гарсан. 2007-2009 оны хооронд дахин залилан мэхлэх гэмт хэрэг үйлдэж, хэргийг шалгаж байх хугацаанд Монгол Улсын хилээр гарч явсан. Улмаар 2019 онд тэрбээр Монгол Улсад эргэн ирсэн. Эргэн ирээд  хуучны найз нөхөд, танилуудтайгаа уулзаж, тодорхой бичлэгийг хийж авсан байсан. Тэрхүү бичлэгт Цэрэндорж, Цогоо, Кёкүшүюзан Д.Батбаярын нэр гардаг. Тэрхүү бичлэг нь 2019 оны гуравдугаар сараас наймдугаар сар хүртэлх хугацаанд дээрх хүмүүстэй дор хаяж, 2-3 удаа уулзаж хийсэн бичлэгээ эвлүүлсэн. Тухайн бичлэгээ хийчхээд нэр бүхий ТВ-д хандсан. Өөрөөр хэлбэл, энэ бичлэгээ монтажлаад Кёкүшүюзан Д.Батбаяраас нэг тэрбум төгрөг нэхэмжилье, 60 хувийг нь өөрөө авч, 40 хувийг нь ТВ-дээ өгнө гэдэг байдлаар тохирсон. Энэ өөрөө гэрчтэй, 10-15 хүний дэргэд болсон яриа.

Ц.Алтанзаг гэж хүн нь өөрийгөө сахрын өвчтэй, хорт хавдартай гэж ярьж, н.Цэрэндорж гэх иргэнээс 60 сая төгрөгийн машин, н.Цогоо гэж хүнээс 10 сая төгрөг, 10 мянган ам.доллар, Кёкүшүюзан Д.Батбаяраас 1800 ам.доллар болон 5 сая төгрөг авсан байдаг. Бичлэгт дурдагдаад буй 32 сая ам.долларын тусгай зөвшөөрлийг зарсан гэх зүйл бодит амьдрал дээр огт болоогүй. Батбарын дансанд өнөөдрийг хүртэл хятадуудаас 32 сая ам.доллар орж ирээгүй. Үүнтэй холбоотой бичиг баримтыг хуулийн байгууллагад гаргаад өгсөн.

Бид Хан-уул дүүргийн цагдаагийн газарт гомдол гаргасан. Монголбанк бол 20 сая төгрөгөөс дээш шилжүүлгийг шалгадаг" гэсэн юм.

А.АНИР